Etu ị si ebi ndụ ga-esi metụta akịrị gị

Ọ bụrụ na ị na-ese sịga, na-aṅụ oke mmaya ma na-eri oke nnu, o nwereike ibutere gị ọrịa kansa akịrị (cancer of the kidney) dịka Dọkịta Obuka Chiamaka Maryann si kwuo.

Nrụrịtaụka BBC Igbo na Dọkịta Obuka Chiamaka Maryann kọwara ọrụ akịrị mmadụ (kidney) na-arụ na ahụ mmadụ na etu ị si ebi ndụ nwereike imetụta akịrị gị.

Dọkịta Chiamaka kọwara na akịrị bụ otu n'ime ọtụtụ anụ ahụ mmadụ mwere ọrụ dị icheiche ọ na-arụ.

N'okwu ya 'Akịrị bụ akụkụ ahụ dị oke mkpa n'ahụ mmadụ. Ọrụ akịrị na-arụ gunyere nnyọcha ihe mmadụ riri n'ọnụ dịka ọgwụ, nri, mmiri ma wepụ ihe na-ekwesighi ị nọ n'ime ahụ mmadụ'.

Ọ kọwara na ọ bụ akịrị na-eme ka mmadụ ghara inwe ọbara mgbalielu. Ọ bụrụ na na mmiri kọrọ n'ahụ mmadụ, ọ bụ akịrị na-ekesa obere mmiri dị gị n'ahụ iji gbochie ọbara mgbalielu.

Ọrụ ọzọ kidney na-arụ bụ ịmepụta vitamin D n'ahụ mmadụ.

Gịnị na-eme ka akịrị kwụsị ịrụ ọrụ?

Dọkịta Chiamaka kwuru na e nwere ọtụtụ ihe nwereike ịme ka akịrị mmadụ kwụsị ịrụ ọrụ. Lee ha ebe:

Kedụ etu i si ebi ndụ ga-esi metụta ndụ akịrị gị?

'Ọ bụrụ na ị bụ onye na-aṅụ oke mmanya, na-ese anwụrụ, nke a nwereike ibutere gị ọrịa kansa akịrị', ka Dọkịta Chiamaka kwuru.

Ọ gara n'ihu kwuo na 'Ịri oke nnu na ihe e ji esi nri na-atọ oke ụtọ nwere sodium nwereike ịmetụta akịrị gị'.

'Anyị na-agwa ndị nwere ọrịa kidney ka ha belata ịta anụ maka na ọ bụ akịrị adịghịzi ike ịnyọcha ihe etu o kwesịrị', ka ọ gbakwụnyere.

N'aka nke ọzọ, Dọkịta Chiamaka mere ka a mata na ude ọcha, ude na-ewepụ nje ihu, ude na-eme ka mmadụ ghara ịka nka (anti-aging cream) nwereike ịmetụta akịrị mmadụ.

Ọzọ bụ ịṅụ ọgwụ dọkịta ahụike enyeghị gị.

'Anyị na-agwa ndị mmadụ ka ha ghara ị na-azụ ọgwụ n'aka ndị na-ere ọgwụ n'opkoroụzọ nakwa n'ụgbọala maka na ha abụghị ndị nwere ntozu inye gị ọgwụ'.

Dọkịta Chiamaka kwuru na 'Anaghị aṅụ mmiri, anaghị eri ezigbo nri na nri zuruoke nwereike imetụta akịrị mmadụ'.

Mmadụ e nwereike ịnwụ ma akịrị ya kwụsị ịrụ ọrụ?

Dọkịta Chiamaka kwuru na akịrị kwụsịrị ịrụ ọrụ anaghị eme ka mmadụ daa n'ike ma nwụọ,

'Ọ bụ nkopu mkpụrụ obi nwereike ime ka mmadụ daa n'ike nwụọ'.

N'okwu Dọkịta Chiamaka 'Akịrị na-anaghị arụ ọrụ anaghị eme ka mmadụ daa n'ike wee nwụọ kama na ọ bụrụ na mmadụ nwere ọrịa akịrị nke nọ n'ogogo ise (level 5) nke bụ na akịrị ya akwụsịla ịrụ ọrụ, nke a nwereike imetụta obi onye ahụ.

Oke ọbara mgbalielu nwereike ibute obi nkopu nke na-eme ka mmadụ daa n'ike ma nwụọ.

Anyị na-agwa ndị na-eme egwuregwu dịka bọọlụ, ịgba ọsọ nakwa egwuregwu ndị ọzọ ka ha ga mee nyocha obi ha.

'Oge ụfọdọ mmadụ dara n'ike nwụọ, nyocha na-egosi na onye ahụ nwere ọrịa dị ya n'ahụ nke ọnaghị eleta etu okwesịrị', ka dọkịta kwuru.

Kedụ ihe ngosi ọrịa akịrị?

Nke a ma ama bụ mbeleta mamịrị. 'Onye nwere ọrịa akịrị na-enwe nsogbu ịnyụpụta mamịrị maọbụ mamịrị ya adị ntakịrị.

Ọ bụrụ na onye ahụ chọpụtaghị ya n'oge, ụkwụ onye nwereike ịzaa. Nke bụ maka na ahụ onye ahụ anaghị ewepụ mmiri dị ya n'ahụ o kwesịrị iwepụ.

Ọzọ bụ enweghi ike iku ume ọfụma, ịkwa ụkwara, ịgbọ agbọ, enweghị ike ịrahụ ụra ọfụma n'abalị.

Ọgwụgwọ ọrịa akịrị

Dialysis bụ otu ụzọ e ji agwọ ọrịa akịrị. Nke a bụ oge a na-eji machine mịpụta onye ahụ ọbara dị ya n'ahụ ma nyọcha ya iji wepụta ihe ọbụla na-ekwesighi. Ọ bụrụ na ọrịa onye ahụ erubeghi ogogo ise (stage 5), o nwereike inweta ọgwụgwọ.

Ụzọ ọzọ bụ itinye akịrị ọzọ dị ndụ iji mechie nkw nwụrụ anwụ e wepụrụ ewpụ nke a bụ nke bekee kpọrọ 'kidney transplant'. Tupu e mee nke, a ga-eme nyocha iji mara ka akịrị ọhụrụ ahụ ọ ga-arụ ọrụ n'ahụ onye tupu e tinye ya.

Ọ bụrụ na mmadụ nwee ọrịa akịrị, e nwereike inye ya ọgwụ na-emepụta ọbara n'ahụ mmadụ iji.

Dọkịta Chiamaka kwuru na ọ bụrụ na mmadụ chọpụta ihe ngosi yiri ọrịa akịrị, ọ dị mma ka onye ahụ gakwuru dọkịta ahụ iji nweta ndụmọdụ ma chọpụta ihe ọ ga-eme iji mee ka ọ ghara ịkawanye njọ.