Awakpoola ụlọ onye ji ọkọlọtọ Labour Party azọ ọkwa n'Imo Steeti

Ndị ojiegbe awakpoola ụlọ Nnaemeka Obiaraeri bụ onye ki ọkolọtọ otu ndọrọndọrọ Labour Party azọ ọkwa nnọchite anya Okigwe n'ụlọomeiwu nke Imo steeti n'ụtụtụ ụbọchị satọde.

Ọ bụ n'akwụkwọ ozi Obiaraeri depụtara n'ụtụtụ satọde ka o kwuru nke a ma sị na ndị ojiegbe a gbara ụlọ ya, nke nna ya, na nke nwanna ya ọkụ na ya bụ mwakpo ma gbaa kwa ụgbọala ha ọkụ.

O kwuru na ọ bụ ndaghe nke otu patị All Progressive Congress nọ n'ọchịchị butere ya bụ mkpamkpa.

Obiaraeri dere sị, " Eritela m ọdachị ọzọ nke sitere n'enweghị ezi nchekwa na Naịjirịa".

Ọ gara n'ihu dee sị, " Ndị ojiegbe a amaghị ndị ha bụ (kama ndị zitere ha ma ndị ha bụ), gara n'ụlọ m dị n'ama nna m nke dị n'Amagu Ihube were gbaa ụlọ m ọkụ naụgbọala ndị m ji arụ ọrụ. Ha gbakwara ụlọ nna m ọkụ, na nke nwanna m...egwu ka ji nne m na ụmụnne m aka ugbua".

O dere na ndị a ji ụgbọala Hilux atọ were bịa ma enweghị onye ọbụla gbochiri ha.

Ọ dekwara sị, " Amaghị m onye m mejọrọ na ihe mere mmadụ ji achụ m...enweghị onye m ji ji maọbụ ede ya".