Climate Change: Ihe i kwesịrị ịma maka oke okpomoọkụ a dị ugbua - NiMet

Onye ma ihe ekwe na-akụ gbasara mgbanwe ihu eluigwe si n'ụlọọrụ na-ahụ maka ihu eluigwe na Naịjirịa bụ 'Nigerian Meteorological Agency' (NiMet) akọwaala ihe na-ebute oke okpomoọkụ dị ugbua na Naịjirịa.

Osote onyeisi NiMet bụ Oluchukwu Anokwu kwuru na ndị mmadụ soro kpalie okpomoọkụ dị ugbua site n'ihe dị icheiche ha na-eme.

O kwuru na iji nkụ na-esi ihe so ebute ihe mere okpomoọkụ jiri dị ma kọwaa na nke ka nke bụ ndị na-amị mmanụ agbịdị.

N'okwu ya, "ụfọdụ na-asị na ọ bụ ndị na-arụ okporoụzọ gara jichie mmiri ozuzo, okpomoọkụ a na-achọ ikpogbu ndị mmadu, mụ a na-achị ha ọchị; ọ bụ ndị na-arụ okporoụzọ jichiri mmiri na Legọs nakwa ebe niile?

"Asịrị m ha na ọ bụghị ndị na-arụ okporoụzọ jichiri mmiri, kama ọ bụ mgbawe ihu eluigwe butere okpomoọkụ a."

"I lee anya n’ụwa gburugburu e nwere mkpụrụedemede gosiri na ihe gbanwere. A bịala nwee mgbakwunye n'etu o si adịbu.

" Anyị nyochara ya wee hụ na ọ bụ ihe ahụ a na-ekwu na-emetụta ebe a. Okpomoọkụ dị ebe niile."

"Okpomoọkụ ahụ bụ ihe na-ebute mmiri ozuzo. Okpomoọkụ ahụ dịrị, ọ na-eme ka mmiri zoo n'ike, nke na-ebute mbuze."

"Ọ bụrụ na ị kọnye ihe n’ubi ma mmiri ezoghị mgbe o kwesịrị izo, ọ na-emetuta ya." "Mgbe ụfọdụ mmiri na-amalite izo ma gbabie n’ike. E nwere ike mmadụ kọchaa ịhe n'ubi, anwụ akpọnwụọ ya".

"N'afọ gara aga, ị ga-ahụ na oke mmiri ozuzo buuru ụlọakwụkwọ ebe ụmụaka na-agụ akwụkwọ ọkachasị ndị bi n’ikpere mmiri."

"Ndị ọkachamara Sayensi chọpụtara na ọ na-emetụta ahụike. Ọrịa dị icheiche na-eso mgbanwe ihu eluigwe."

"E kwesịrị ị na-akwado ndị mmadụ ka ha na-eji gaasị esi nri maka na isi ihe na nkụ so eme ka mgbanwe ihu eluigwe kawanye njọ."

"Anwụrụ ọkụ ndị na-esi n'ịmị mmanụ 'crude' karịrị nke ndị mmadụ na-esi nri na nkụ na-ewepụta.

"Ndị na-achị anyị ga-agba mbọ chọwa ụzọ ọzọ ala anyị ga na-esi akpata ego nakwa ụzọ ọzọ a ga-esi mee ka mmanụ ahụ ghara ị dị na-ebunye anwụrụ ọkụ n’ikuku maka na ọ ga-ebute nsogbu n'ọdịnịihu."