E bubala akpati ozu Ezenwaanyị Elizabeth II n'ime Westminster Hall ka ọha malite ile ya

Ọha ndị mmadụ amalite kemgbe elekere ise nke taa bụ Wenezde aga nwayọ nwayọ dịka ogologo ahịrị na-ebuba ha n'ime Westminster Hall bụ ebe e dobere akpatị ozu Ezenwaanyị Elizabeth nke abụọ taa.

Cheta na e si n’obi Eze nke Buckingham bupụ akpatị ozu Ezenwaanyị taa bụ Wenezde.

E ji inyinya buru akpatị a dịka Eze Charles nke atọ na ndị ezinaụlọ Eze nakwa ndị ọrụ nchekwa pụrụiche sonyere n’ahịrị n’azụ ndị bu akpatị a.

Puku kwuru puru ndị mmadụ bụ ụfọdụ ndị malitere ịche ịhụ akpatị a kemgbe abalị gara aga gbakọtara na-elele ka e bu akpatị na-agafee.

Dịka e bu akpatị a, gbaliri egbe elu ugboro ugboro n’akụkụ Hyde Park nakwa n’ebe ama Big Ben, nke a bụ iji kwanyere ya ugwu.

E bugara akpatị ozu Ezenwaanyị gaa Westminster Hall nke bụ ebe ọ ga-anọ ruo abalị anọ tupu e lie ya n’ụbọchị Mọnde.

A ga-amalite ịnabata ọha ndị mmadụ n’ebe elekere anọ nke ụbọchị Wenezde ka ha nweeike kwụrụ n’ahịa ma gafee kwanyere Ezenwaanyị ugwu nke ikpeazụ.

Dịka e bubatara akpatị ozu ya na Westminster Hall, Achịbishọpụ nke Canterbury bụ Justin Welby kaara ụka ma kpee ekpere n’isi ya ma gụọ akwụkwọ nsọ. Ndị otu egwu ụka nke ụka Angịlịkan bụkwara abụ ọma dị iche iche n’emume ụka ahụ.

Ndị sonyere n’emume ụka a bụ ezinụlọ Eze nakwa ndị ụlọomeiwu mba Briten nakwa ndọrọndọrọ ọchịchị mba ahụ nwere agba.

A ga-agbapee Westminster Hall kwa ụbọchị malite n’ụtụtụ ruo abalị kwa ụbọchị ruo ụbọchị Mọnde.

Ọtụtụ ndị mmadụ agbakọọla n'ụzọ ebe akpati ozu nke Ezenwaanyị Elizabeth nke abụọ ga-esi agafe na Central London taa.

Ndị mmadụ na-eche inweta ohere ha ga-eji akwanyere ya ugwu ikpeazụ mgbe akpati ozu ya ga-erute na Westminster Hall.

Ndị mmadụ kwụ n'ahịrị na mpụta Obieze Buckingham tipuru mkpu dịka ụgbọala bụ ahụ Ezenwaanyị Elizabeth II nwụrụ banyere n'Obieze ahụ.

Eze Charles III, ụmụ ya abụọ bụ Ọkparaeze William na Ọkparaeze Harry nakwa ndị ezinaụlọ ya niile so na ndị nabatara ahụ ya.

Ndị mmadụ tiri sị 'zuo ike n'udo!' dịka ụgbọala ahụ gbafere ha.

Dịka ọ dị ugbua, Eze Charles na nwunye ya bụ Ezenwaanyị (Consort) ahapụla obieze Buckingham ahụ.

Cheta na njem a maliter kemgbe elekere iri n'ụtụtụ ụbọchị ụka mgbe ha hapụrụ Balmoral ebe Ezenwaanyị nwụrụ.

Puku kwuru puku mmadụ pụtara kwụrụ n'ahịrị site na mpụta London banye n'ime ya iji nweike hụ Ezenwaanyị ha na njem ikpeazụ ya.

Ahu Ezenwaanyị ga-anọ n'Obieze a otu abali tupu e bupu ya na Hallụ Westminster ebe ndị mmadụ ga-enweike ịbịa kwanyere ya ugwu ikpeazụ.

Ihe ga-eme n'ụbọchị Wenzde n'usoro akwamozu Ezenwaanyị

Ndị obodo ga-edu ahụ Ezenwaanyị site Buckingham Palace gawa Westminster dịka okụchara 14:00.

A ga-eji ụgbọ eji ebu nnukwu egbe nke ndị agha Eze nke Royal Horse Artillery, ndị agha na ndị ezinụlọ Eze ga-eso kwa ya.

Eze Charles ga-edu ndị a dịka ọ ga-eso igbe ozu a n'azụ, nke a ga-eji okọlọtọ Royal Standard kpuchie.

Igwe mmadụ nwereike ilele njem a dịka ha si Queen's Garden, The Mall, Horse Guards, Horse Guards Arch, Whitehall, Parliament Street, Parliament Square na New Palace Yard. A na-eche na njem a ga-ewe nkeji 40.

A ga-enwe nnukwu ihe onyonyo maka emume a na capital's Royal Parks.

A ga-edowe igbe ozu ya, na-ebe dị elu nke a na-akpọ Catafalque, n'okpuru Imperial State Crown, orb na sceptre, na Westminster.

Ndị agha nke Roral Household ga-echekwa akụkụ ebe a niile oge niile n'ụbọchị.

Archbishop nke Canterbury bụ Justin Welby ga-aka ụka obere oge nke Eze Charles na ndị ezinụlọ eze ọzọ tupu enye ndị ọha ohere ịbata.