Nnamdi Kanu Sit at home: Etu nọrọ n'ụlọ n'Ọwụwa Anyanwụ nke ụbọchị Mee 18, 2022, bụ ụbọchị ikpe Nnamdi Kanu si gaa

Dịka Nnamdi Kanu, onye ndu otu nnwereonwe Biafra bụ Ipob na-apụta n'ụlọikpe taa, ọtụtụ ebe n'Ọwụwa Anyanwu Naijiria tọgboo chakoo.

Otu Indigenous People of Biafra kpọburu oku ka ndị mmadụ nọrọ n'ụlọ taa bụ Wenezde, abalị 18 nke ọnwa Mee,afọ 2022 iji kpoo oku ka Eọọmentị Etiti tọhapụ onye ndu ha.

A na-ekpe Nnamdi Kanu bụ onye a nwụchiri na mba Kenya ma kpụlata ya Naijiria n'abalị 24 nke ọnwa Juun, afọ 2021, ikpe maka ebubo metụtara iyi ndụ egwu na ịkpa nkata ịkwatu gọọmentị Naijiria.

Ndị ntaakụkọ anyị gararịị wetara akụkọ etu ụlọakwụkwọ, ụlọakụ nakwa na ọdọahịa siri mechie ebechie n'ebe dị iche iche n'Ọwụwa Anyanwụ.

N'Aba, ebe nile tọgbọ chakoo

N'aba, ebe nile dị ka ebe a gbara ọsọ.

Onye ntaakụkọ anyị nọ na'Aba kwuru na okporoụzọ a ma ama tọgbọọ chakoo.

E nweghị ụgbọala na-aga mana mmadụ ole na ole n'okporoụzọ.

Ụlọakwụkwọ, ụlọakụ, ọdọmmanụ ụgbọala n'ọdọ ụgbọala emepeghị.

Ọbụla ndị obere ọdọahịa n'nso n'ụlọ ndịmmadụ emepeghị.

Ndị ọrụ nchekwa; ndị uweojii, ndịagha na-agagharị iji hụ na o nweghị nsogbu dapụtara.

N'Ebonyi, ọtụtụ ndị mmadụ apụtaghị ama

Ebonyi bụ steeti ndị mmadụ anaghị esonyebu n' oku nọrọ n'ụlọ mana taa bụ abalị 18 nke ọnwa Mee, afọ 2022, ọtụtụ ndị Ebonyi apụtaghị ama.

Onye ntaakụkọ anyị gagharịrị n'Abakaliki kwuru na ụlọakụ, ọdọahịa, ahịa nakwa ụlọọrụ ndị na-akwọ ndị njem emepeghị emepe.

Ọbụladị n' ahịa Margaret Umahi International Market, Afikpo Road,na New Market Road, Peace Park, o nweghị ndị na-azụ maọbụ ere ihe.Ma ụlọakwụkwọ praimari,sekọndrị na ụlọakwụkwọ dị elu dị na steeti ahu emepeghị.

Ụlọakụ emepeghị ka ha a hụụ mkpụrụ mmadụ ole na ole na-ewe ego n'igwe ego ATM.

N'Owere, ebe nile dị ka ebe a gbara ọsọ

N'Owere ,Imo steeti, onye tụpụ ntụtụ, a ga-anụ ụda ya dịka ndị mmadụ apụtaghị ezi taa.

N'Enugwu, ụfọdụ nọ n'ụlọ, ụfọdụ pụrụ ama

Iro ekwọchaghị ekwo ka ọ na-adị mbụ mana o kwokarịrị ka ọ dị na Monde abalị Mee 16, afọ 2022 e meburu nọrọn'ụlọ.

Ahịa, ụlọakwụkwọ na ụlọakụ emepeghị.N'Abakpa Nike, ole ma ole ụmu obere ụgbọala, keke na ụgbọla ndị mmadụ nwere onwe na-agagharị.

N' Okporoụzọ awaraawara Enugwu- Abakaliki gawa 82 Division, ụgbọala na-agatụ mana ọdịọ́ ahịa kpochichara akpọchi.O nweghị ahịa maọbụ ụlọakwụkwọ maọbụ ụlọnri mepere na New Heaven site n'Upper Chime to Down Chime.

Onye ntaakụkọ ahụ hụrụ na mpaghara Government House ọkachasị ụzọ Bisala Road, Rangers Avenue were rue Presidential Road ruo Obiagu tọgbọ chakoo, o nweghị ahịa na-azụ ebe ndị a. Ọtụtụ ahịa dị na-Enugwu, ọdọ mmanụ ugbọala na ụlọọrụ gọọmentị emepeghị.

N'Ụmụahịa, ebe nile dara jụụ

N'Umuahia, isiobodo Abia steeti, ebe nile dere jụụ.

Ụlọakwụkwọ, ụlọọrụ, ọdọụgbọala, ọdọ mmanụ ụgbọala, ebe a na-ere nri na ihe ndị ọzọ emepeghị na-agbanyeghị na o nweghị onye na-amanye onye ọbụla.

N'Afaraukwu be Nnamdi Kanu na obodo ndị dị ya nso, ụlọahịa na ụlọakwụkwọ agbapeghị.