Glaucoma: Ọrịa ọjọọ nwere ike ime ka anya pịa mmadụ n'otu ntabi anya

- Onye dere ya, Chukwunaeme Obiejesi
- Ndị mere akụkọ a, Broadcast Journalist, Igbo
8 Jenụwarị 2021

Ị ma na i nwere ike bilie n'ụra otu ụbọchị chọpụta na ị nakwaghị ahụ ụzọ?

Ama m na ị ga-asị 'tụfiakwa', maọbụ 'Chineke ekwela', mana ọrịa Glaucoma maọbụ Cataract nwere ike ime ka ihe dị otu a mee.

Aha onyonyo, Eye care: Ihe ise ị ga-eme ka anya gị ghara ịkpọ

Ọbụrụ na anya mmadụ adịghị, ọchịchịrị ga-agbachi ahụ mmadụ niile, ụwa enwekwaghị ihe ọ ga na-atọ.

Ya mere o ji dị mkpa ichekwa anya gị ma gbochie ọrịa Glaucoma nakwa Cataract, nke nnyocha gosiri na ọ bụ ha kacha ebutere ndị mmadụ ikpu isi n'ụwa niile.

Gịnị bụ Glaucoma?

Nwata nwere Glaucoma — Nkọwa foto, Glaucoma na-emekarị ndị gbagoterela n'afọ, mana ụmụaka nwekwara ike inwe ya

E nwere akwara si n'anya mmadụ gaa n'ụbụrụ isi; Bekee na-akpọ ya 'optic nerve'.

Ọ bụrụ na ike gwụ akwara a, ọ gaghịkwa enwe ike iziga ozi iji mee ka ụbụrụ ghọta ihe mmadụ na-ahụ.

Glaucoma bụ ọrịa na-emebi akwara 'optic nerve' ma mee ka mmadụ kpuo isi n'otu ntabi anya.

Dọkịta anya aha ya bụ Ugochukwu Eze kọwara na ọ bụghị na ọrịa glaucoma na-abịa n'otu ntabi anya, kama ọ na-eji nwayọ nwayọ amalite, nke pụtara na mmadụ agaghị enwe ike ịchọpụta ruo mgbe ọ kawanyere njọ.

Skip Akachasị Gụọ and continue reading

Akachasị Gụọ

End of Akachasị Gụọ

Nkọwa foto, Dọkịta Ugochukwu Eze bụ dibia anya n'ụlọọgwụ 'National Eye Centre' dị na Kaduna

Mana oge ahụ, ọ dịla njọ, onwekwaghị ihe mmadụ ọbụla nwere ike ime maka ya.

Dọkịta Eze kwuru sị: "Ọ bụrụ na a chọpụta glaucoma n'oge, anyị nwere ike inyere onye ahụ aka ka anya ya ghara ịkpọ kpam kpam."

"Mana ọ bụrụ na ya bụ ọrịa apịala mmadụ anya, onweghị ihe mmadụ ọbụla nwere ike ime iji nyere onye ahụ aka."

Ihe gbara ọkpụrụkpụ i kwesịrị ịma maka Glaucoma:

Nkọwa foto, Felipe Gomes bụ onye na-eme egwuregwu 'paralympics' na mba Brazil. Ọ bụ Glaucoma na Cataracts nke o butere site n'afọ nne ya mere ka o kpuo isi.

Ihe na-akpata ya bụ mmiri ịdọ n'anya mmadụ karịa etu o kwesịrị nke ga-eme ka ibu anya mmadu bu dị nnukwu arọ (eye pressure)
Nnyocha gosiri na ọ na-esikarị n'agbụrụ (site n'aka nne na nna fee ụmụ ha na ụmụ ụmụ ha)
Glaucoma enweghị ọgwụgwọ ga-eme ka ọ laa kpamkpam, kama a ga-enye gị ọgwụgwọ ga-enyere gị aka ka anya gị ghara ịkpọ
Ọnaghị enwekarị ihe njirimara na-egosi na ọrịa a amalitela n'anya mmadụ, mana anya mmadụ ịcha mmeemmee maọbụ ịfụ ya ụfụ, nwere ike ịrụtụ aka gbasara ọrịa a
O nwereike tupu mmadụ achọpụta na o nwere Glaucoma, onye ahụ ekpuolarị isi n'otu anya
Ọ na-emekarị ndị dị malite n'afọ iri anọ gbagowe, mana ụmụntakịrị na ndị na-eto eto na-enwekwa ya
Nnyocha gosiri na ndị isi ojii nakwa ndị Asia kacha enwe ọrịa a
Ọgwụ ụfọdụ mmadụ na-aṅụ nwere ike ịkpata ya (nke a gụnyere ọgwụ nwere 'steroids')
Ọrịa glaucoma nwere ụdị abụọ gbara ọkpụrụkpụ, ha bụ 'Open-angle glaucoma' na 'Angle-closure glaucoma'
Mana enwekwara ụdị ọzọ anaghị ahụ kwadaa, ha bụ 'Normal-tension glaucoma', 'Pigmentary glaucoma' na Glaucoma nke ụmụaka
Ọrịa anya ndị ọzọ nwekwara ike ịkpatara mmadụ glaucoma; a na-akpọ ya 'secondary glaucoma'

Mgbochi glaucoma

Ụzọ kacha dị ire iji zeere ọrịa glaucoma bụ ị na-eme nnyocha n'anya gị ugboro ugboro.
Ọ bụrụ na nnyocha gosi na ọrịa a na-amalite n'ahụ gị, dọkịta ga-enye gi ọgwụ ị ga na-atụnye n'anya nke ga-enyere gị aka
Na-ekpuchi anya gị oge ọbụla ị na-eme ihe siri ike maọbụ oge ị na-arụ ọrụ dị aṅaa
Zeere ịfịa aka n'anya gị oge ọbụla
Were nwayọọ na-aṅụ mmiri nakwa ihe ndị ọzọ. Ọ bụghị ka ị kwụsị ole mmiri ị na-aṅụ, kama ọ bụ ka ị gbatịa oge i i ji aṅụ ya
Maka ụmụnwaanyị, kpachara anya ụdị ihe ntecha ị na-eji achọ mma, zeere ndị ga-emebi anya gị