Brexit: Ihe ga-eme dịka mba UK na-ahapụ Ọgbakọ Yurop Kpam Kpam na Jenụwarị 1, 2021

Praịm Minista mba Briten bụ Boris Johnson ekwuola na njem mba ahụ nọ maka ịpụta ọgbakọ mba Yurop abịala na mmezu dịka ha na ndị na-anọchite anya Yurop bịara na nkwekọrịta maka atụmatụ Brexit.

Nke a pụtara na Brexit ga-esu n'ụbọchị mbu nke ọnwa jenụwarị afọ 2021.

Johson sị: "na-agbanyeghị na anyị apụọla na otu European Union, Anyị na Yurop ka nọkọtara".

Johnson kwuru nke a oge ọ na-agwa ndị ntakụkọ okwu ụbọchị tọzde.

Okwu ya bịara dịka ịkasị ndị mmadụ obi dịka ọtụtụ na-atụ ụjọ ihe ọpụpụ a pụtara.

Gọọmenti mba Briten kwuru sị "anyị enwetakwala ikike n'elu ego anyị, iwu okeala, iwu obodo, azụmahịa nakwa mmiri a na-akpụ azụ".

Mba dị na Yorup dịka Jamini, Fransi ,Austria na ndị ọzọ akwadola ọpụpụ Briten pụrụ n'otu jikọrọ ha.

Ebe njem a malitere

O meela afọ anọ (site Juun afọ 2016) ụmụ afọ Briten tụrụ vootu were kwuo na ha chọrọ isi na otu "European Union" pụọ.

Mana o ruola afọ 50 kemgbe ha kwenyere isu n'ọgbakọ Yurop nke mere ka ewepu oke ala mba niile nwere nkwekọrịta ị bụ otu ahịa nke Bekee kpọrọ "EU Economic Zone".

N'oge ahụ, ọ bụ sọsọ Briten jidesiri ego aha aka dịka ndị ọzọ ji ego Euro gbanwe nke ha.

Ihe Brexit ga-ebutere ndị Briten

Brexit a pụtara na ndị Briten abụghịzị ndị Ọgbakọ Yurop nke pụtara na oke ala ha abụghịzi ihe mmadu maọbụ ibu ga-agafe etu o si chọọ.

Onye chọrọ isi Yurop gaa Briten maọbụ Briten gaa Yurop ga-ejizi akwụkwọ ikike. Tupu e binya aka n'akwụkwọ Brexit a, mmadu na ibu na ụgbọala na-abata ma na-apụ na-enweghi mbochi.

Ndị Yurop agaghị a na-ebinwụ na Briten.

Ndị Briten agaghị enwesi ikike ibi na Yurop n'enweghi akụkọ.

Etu o si metụta Nọten Ịland

Mba Nọten Ịland ka ga-anọ n'ihe a kpọrọ "EU single market for good".

Briten na Yurop nwere nkwekọrịta iji hụ na oke ala Nọt ana Sawụt Ịland agbachighị agbachi.

Nke a pụtara na ihe emepụtara na ịnland ka ga na-abanye Yurop na-enweghị mgbachi ọbụla.

Ihe ndị ọzọ Brexit metụtara

Ọ bụghị sọsọ azụmahịa nakwa nagharị mmadụ ka iwu a metụtara.

Dịka nkwekọrịta eji hibe Ọgbakọ Yurop siri di, o metụtara njem ala n'ụgbọelu, atụmatụ ngbanwe eligwe a kpọrọ "climate change" nakwa mmekọrịta nchekwa.

Ugbua, mmekọrịta siri welele ndị a niile ga-abịa na njedebe.

Ọ ga-arịa ahụ inwete mmekọrịta ga-awa n'ihu karịa etu ọ dibu na mbụ.