Arsenal vs Newcastle: Arsenal ewerela 'chizoba' zaa aha nna ha
Ebe foto si, Getty Images
Ndị otu egwuregwu bọọlụ Arsenal, esorola ndị Manchester City, Liverpool nakwa Tottenham were gbaa aka ahịa na afọ EPL ọhụrụ.
Arsenal gbalịrị zaa aha nna ha site n'iji otu ọkpụ goolu merie Newcastle taa.
Mana mmeri ahụ akpụghị ọkụ n'ọnụ n'ihi na ha achakeghi ka ọnwa ma ncha.
Aubamenyang bụ onye nyere otu goolu ahụ ha ji gbaa aka ahịa na nkeji iri ise na asatọ.
Ebe foto si, PA Media
Lịka lịka niile ndị Newcastlke gbara iji saa otu goolu ahụ amịtaghị mkpụrụ.
Mmeri a ga-atọ Unai Emery, onye nkụzi ndị Arsenal ụtọ maka na ọtụtụ n'ime ndị Arsenal jiri biri esoghi sọọ mpi nke taa.
Mmadụ dị ka Alexandre Lacasete nakwa David Luis bu onye e si Chelsea zụta abalị ole na ole gara aga anọghị n'egwu taa.
Ọzọkwa, Pepe, bụ onye Arsenal si Lille na France zụta, esoghi bido bọọlụ taa, kama e tinyere ya etinye na nkeji iri asaa na otu.
Ebe foto si, Reuters
N'aka nke ọzọ, onweghi onye meriri na asọmpi nke dị n'etiti Leicester na Wolves.
Ha abụọ gbara onwe ha onye lawa onye lawa.
Anya niile nọzị na ama egwuregwu 'Old Trafford' ebe ndị Manchester United ga-ezute ndị Chelsea.
Akụkọ ndị ọzọ ga-amasị gị:
