Zik bụ "ihe" nye ndị isi ojii - Saraki

17 Nọvemba 2018

N'emume iji cheta Nnamdi Azikiwe ama dịka "Zik nke Afrịka" so n'isi a hụrụ kwaba okpu n'ala Naịjirịa nakwa mbaụwa, naanị otutu juru Bukola Saraki ọnụ maka ya.

N'emume "Zik Lecture Series" e mere n'Ọka bụ nke asaa, Saraki bụ onyeisi ụlọomeiwu ukwu nke Naịjirịa, kwuru na Zik mere ọtụtụ ihe ọma e ji echeta ya.

O kwuru na Zik bụ "Owelle ndị Ọnịcha" bụ onye anaghị akpa oke ma bụrụ "ihe" nye ndị agbụrụ isi ojii.

Ihe ise Saraki kwuru

Zik so na ndị bidoro usoro nnwereonwe ndị Afrịka, otu onye n'ime ndị amamihe, ọhụụ na ozi ha nakwa obi ike ha nyere aka gbapụta Naịjirịa n'aka ọchịchị Briten.
O kwuru na Zik mekwara ihe e ji mara aha n'ebe ụwa sọtụrụ; ịma atụ ya bụ okwu o kwuru na nzukọ udo ndị Briten mere na 1949, ebe zik gwara ha ka ha nye Naịjirịa nnwereonwe.
Zik bụ onye nwere ọgụgụ isi, onye ike dị n'uche ya jikọtara Naịjirịa na ndị isi ojii mbaụwa niile.
O kwuru na "Zik abụghị naanị onye ndọrọndọrọ ọchịchị nwere akọnaụche, ọ bụkwa onye nkuzi, ọma mbem, onye na-ebiputa akwụkwọ nakwa ode akwụkwọ. O gosiri na ọ na-echebanye echiche ọfụma tupu o mee ihe. O chebanyere echiche ọfụma maka Afrịka ma chekwaa maka ụzọ Naịjirịa na-aga, ma gbalịa ituziri Naịjirịa aka n'ụzọ ọma ọ ga-esi.
Zik bụ onye anaghị akpa oke, o kwenyere na ndịnotu Naịjirịa ma gbaa mbọ ịhụ maka ya. Ọ bụkwa onye aka ya kwụ ọtọ, ma bụrụ otu n'ime ndị Afrịka agaghị echefu echefu.

Ihe ị kwesịrị ịma maka Zik

A mụrụ ya n'obodo Zungeru dị na Naịja steeti.
Ọ na-asụ Igbo, Yoroba na Awụsa.
Ọ hibere ma bụrụ onye nwe akwụkwọ mgbasaozi a kpọrọ "West African Pilot".
Ọ bụ onye isi ojii Afrịka mbụ ga-akuzi na mahadum Lincoln dị na mba Amerịka.
Zik sọrọ mpi n'ihe egwuregwu dịka ịgba bọọlụ, ịpịa ọkpọ, igwu mmiri, ịpịa tenis nakwa ihe ndị ọzọ.
Zik banyere n'otu Agbalanze ndị Ọnịcha n'afọ 1946.
E chiri ya Owelle-Ọsọwa-Anya nke Ọnịcha n'afọ 1972.