Coronavirus: WHO ta yaba aikin Najeriya

Shugaban Hukumar Lafiya ta Duniya WHO, ya yaba da yadda Najeriya ke aikin dakile annobar cutar nimfashi ta coronavirus.

Tedros Adhanom Ghebreyesus ya bayyana haka ne a shafinsa na Twitter biyo bayan rahoton da hukumar kiyaye yaduwar cutuka ta Najeriya ta wallafa irinsa na farko a kasar kan yaduwar kwayar cutar.

"Muna godiya ga hukumar NCDC da gwamnatin Najeriya kan yadda suka zayyana yaduwar cutar COVID19 a kasar," Tedros Adhanom ya fada.

Ya kara da cewa "wannan shi ne aiki karara na bayar da hadin kai kuma mai amfanin gaske wurin dakile coronavirus daga ci gaba da yaduwa".

Najeriya ta tabbatar da rahoton bullar cutar coronavirus ranar 27 ga watan Fabarairun 2020 a asibitin Yaba da ke Legas.

A sanarwar da ya fitar, Ministan Lafiya na Najeriya, Dr Osagie Ehanire, ya ce wani dan kasar Italiya ne da ke aiki a kasar ya shigo da cutar bayan ya dawo Lagos daga birnin Milan.

Hanyoyi 4 na kare kai daga coronavirus

■ Ku wanke hannayenku da sabulun gargajiya ko sabulun ruwa da ake wanke hannu da shi, wato hand gel, wanda zai iya kashe kwayoyin cuta

■ Ku rufe hanci da bakinku lokacin da kuke yin atishawa da kyallen fyace majina - sannan ku wanke hannayenku bayan kun yi atishawa domin hana kwayoyin cutar yaduwa.

■ Ku guji taba idanunku, ko hanci ko bakinku- idan hannunku ya taba wurin da cutar ta shafa, za ta iya yaduwa zuwa sauran sassan jikinku.

■ Kada ku rika matsawa kusa da mutanen da ke yawan atishawa ko tari da masu fama da zazzabi - za su iya watsa cutar cikin iska ta yadda ku ma za ku iya kamuwa da ita. - akalla ku matsa nesa da su ta yadda tazarar da ke tsakanin ku za ta kai kafa uku.