Zakzaky ya ce ya samu shanyewar barin jiki

Shugaban kungiyar 'Yan Uwa Musulmi da aka fi sani da 'yan Shi'a a Najeriya Sheikh Ibrahim El-Zakzaky ya ce ya yi fama da shanyewar barin jiki

Ya bayyana hakan ne yayin da yake ganawa da manema labarai a karon farko ranar Asabar tun bayan da aka kama shi fiye da shekara biyu da suka wuce.

Sheikh El-Zakzaky ya ce ya yi fama da karamar shanyewar jikin ne a cikin makon jiya.

Malamin addinin ya bayyana ne a Abuja tare da mai dakinsa Zeenah wadda ake tsare da su tare.

Rundunar sojin kasa ta Najeriya ce ta kama Sheikh El-Zakzaky a watan Disambar shekarar 2015 a Zaria da ke jihar Kaduna, bayan sojoji sun yi wa gidansa kawanya.

Wata sanarwa da kafar watsa labarai ta PR Nigeria fitar na dauke da hotunan Malamin a lokacin da yake jawabi ga 'yan jaridar.

Gidan talbijin na Channels ya ambato Sheikh El-Zakzaky na cewa yana nan a raye kuma lafiyarsa lau.

Ya kuma gode wa 'yan Najeriya saboda addu'o'in da suke yi masa.

A makon nan ne dai aka yi jitar-jitar cewa malamin ya rasu.

Ga yadda ganawarsa ta kasance da 'yan jarida:

'Yan jarida: Barka da rana?

'Yan jarida: Ko za ka iya ganawa da mu?

Sheikh El-Zakzaky: Idan sun amince kuma sun ba ni izini (kamar yadda ya ce cikin raha)

'Yan jarida: Wane hali kake ciki?

'Sheikh Zakzaky: Na samu shanyewar barin jiki a ranar Juma'a 5 ga watan Janairun bana

Sheikh Zakzaky: Jikin ya yi tsanani ranar Litinin, amma daga baya jikin ya yi sauki

'Yan jarida: Yaya kake ji yanzu haka?

Sheik El-Zakzaky: Ina samun sauki jami'an tsaro sun bari na gana da likitan. Ina godiya ga Allah. Ina samun sauki.

'Yan jarida: Kana da wani abu da za ka kara cewa.

Sheikh El-Zakzaky: Ina godiya ga addu'o'inku.

'Yan jarida: Mun gode

Sheikh El-Zakzaky: Na gode.