Everton ta sanar da korar kociyanta Sean Dyche

Everton ta kori kociyanta, Sean Dyche kamar yadda ƙungiyar dake buga Premier League ta sanar ranar Alhamis.

Hakan ya zo ƴan awanni tsakani da Everton za ta kara da Peterborough a zagaye na uku a FA Cup.

Everton ta sanar cewar kocin matasanta ƴan kasa da shekara 18, Leighton Baines da ƙyaftin Seamus Coleman za su ja ragamar ƙungiyar a matakin riƙon ƙwarya.

Ƙungiyar da rukunin Friedkin ya mallaka, zai fara neman sabon kocin da zai maye gurbin Dyche - ana ta alakanta Jose Mourinho da aikin na Goodison Park.

Lokacin da Fredkin ya sayi ƙungiyar a cikin Disambar 2024, ya sanar cewar yana tare da Dyche ya gamsu da rawar da yake takawa.

Everton tana ta 16 a kasan teburin Premier League da tazarar maki ɗaya tsakani da ƴan ukun karshe, wadda take da ƙwantan wasa da Liverpool.

Rabonda Everton ta ci wasa tun bayan doke Wolverhampton a farkon watan Disamba a Premier, wadda ta yi wasa biyar a jere ba tare da nasara ba.