KAI TSAYE, Abubuwan da ke faruwa a Najeriya da sauran sassan duniya 22/01/2026

Rahoto kai-tsaye

Ibrahim Yusuf Mohammed da Aisha Babangida da Haruna Kakangi

1. Mintuna 50 da suka wuceMutane da dama sun ɓace bayan zaftarewar ƙasa a New Zealand

   Mutane da dama, ciki har da aƙalla ƙaramin yaro guda, sun ɓace bayan zaftarewar ƙasa a wani sansani a da ke kusa da Dutsen Maunganui, na ƙasar New Zealand.

   Masu aikin ceto suna wurin, suna ta ƙoƙarin tono waɗanda suka maƙalae a ƙarƙashin tarkace.

   Wasu mutum biyu kuma sun ɓace sannan mutum ɗaya ya samu munanan raunuka bayan zaftarewar ƙasa a kusa da Papamoa.

   Ruwan sama kamar da bakin ƙwarya ya yi ɓarna a akasarin yankunan tsibirin da ke arewacin ƙasar, inda bidiyo da aka wallafa a intanet ke nuna ɗimbin wuraren da ambaliyar ruwa ta mamaye.

   An ayyana dokar ta ɓaci a yankin Bay of Plenty da sassa daban-daban na tsibirin, da suka haɗa da Northland da Coromandel da Tairāwhiti, da Hauraki.

   An umurci waɗanda ke zaune a wuraren da lamarin ya shafa da su hanzarta ficewa daga yankunan.

2. Sa'a 1 da ta wuceAn saka ranar gudanar da zaɓen shugaban ƙasar Guinea-Bissau

   Shugaban gwamnatin sojin ƙasar Guinea-Bissau, Janar Horta N’Tam, ya sanar da cewa za a gudanar da zaɓukan shugaban ƙasa da na majalisar dokoki a ranar 6 ga Disamba.

   An bayyana hakan ne ta cikin wata dokar shugaban ƙasa da Janar N’Tam ya rattaɓa wa hannu a ranar jiya, Laraba.

   Wannan sanarwa ta biyo bayan juyin mulkin da aka yi a watan Nuwambar 2025, wanda ya kai ga kifar da tsohon shugaban ƙasa, Umaro Sissoco Embalo, a daidai lokacin da ake shirin bayyana sakamakon zaɓen shugaban ƙasa.

   Wasu masu sa ido daga yankin, ciki har da tsohon shugaban Najeriya, Goodluck Jonathan, sun yi zargin cewa an shirya yunƙurin juyin mulkin ne tun da farko.

   A baya, ƙungiyar ECOWAS ta ƙi amincewa da shirin gwamnatin sojin na miƙa mulki cikin shekara guda, inda ta nemi a gaggauta komawa mulkin dimokraɗiyya.

   Yanzu da aka saka ranar zaɓe a 6 ga Disamba, ana sa ido ko hakan zai haifar da sauyi mai ma’ana a ƙasar da ta shahara da yawan juyin mulki.

3. Sa'o'i 2 da suka wuceMazauna Kurmin Wali sun zargi hukumomi da rufa-rufa bayan sace jama'a

   Mazauna yankin Kurmin Wali da ke ƙaramar hukumar Kajuru a jihar Kaduna sun zargi hukumomi da ƙoƙarin hana yaɗuwar bayanai bayan sace mutane 177 daga coci uku da aka yi a ranar Litinin.

   Wasu mazauna yankin sun shaida wa BBC a ranar Laraba cewa jami’an gwamnati sun hana mutane magana da kafafen yaɗa labarai, tare da ƙoƙarin toshe hanyoyin shigar ‘yan jarida zuwa cikin al’ummar.

   Wani mazaunin yankin, wanda ya nemi a sakaya sunansa saboda dalilan tsaro, ya ce jami’ai sun gargaɗi jama’a da su yi shiru kan harin.

   Haka kuma, BBC ta fuskanci matsala wajen isa Kurmin Wali, bayan da jami’an tsaro da na gwamnati suka fara ƙoƙarin hana su shiga yankin.

   Gwamnan Jihar Kaduna, Uba Sani, ya ziyarci Kurmin Wali kwana uku bayan harin, inda ya yi alƙawarin kafa sansanin soji a yankin.

   Ya kuma sanar da wasu matakan tallafi ga waɗanda abin ya shafa.

   Sai dai iyalan waɗanda aka sace da al’ummar yankin sun ce suna cikin firgici da tashin hankali.

   Da farko dai, ‘yan sanda da jami’an ƙaramar hukuma sun musanta faruwar hare-haren da sace mutanen, kafin daga bisani suka tabbatar da cewa lamarin ya faru.

4. Sa'o'i 2 da suka wuceAn samu wata ƴar jarida da laifin tallafawa ayyukan ta'addanci a Philippines

   An samu wata ƴar jarida a ƙasar Philippines da laifin bayar da kuɗaɗe dominj tallafawa ayyukan ta'addanci tare da yanke mata hukumcin ɗaurin aƙalla shekara 12 a gidan yari, a wani lamarin da ƙungiyoyin kare ƴancin ƴan jarida suka bayyana a matsayin rashin adalci.

   An kama Frenchie Mae Cumpio, ƴar shekara 26 a watan Fabrairun 2020 bayan da sojoji suka kai farmaki gidanta da tsakar dare inda aka yi zargin sun samu gurneti da bindiga, da kuma tutar ƴan gurguzu a ƙarƙashin gadonta.

   Ƙungiyoyin kare haƙƙi sun yi watsi da tuhume-tuhumen inda suka ce an kama ƴa jaridar ne saboda ta kasance mai sukar ƴan sanda da sojoji.

   Masu lura da al'amura dai na cewa, an ƙara ƙaimi wurin take haƙƙin ƴan jarida da masu fafutuka a ƙarƙashin shugabancin Rodrigo Duterte, wanda ya ƙaddamar da mummunan shirin yaƙi da miyagun ƙwayoyi daga shekarar 2016 zuwa 2022.

   A ranar Alhamis, bayan shafe shekara shida a gidan yari ba tare da shari’a ba, an wanke Cumpio daga tuhumar da ake mata na mallakar makamai da bama-bamai ba bisa ƙa’ida ba, amma an same shi da laifin bayar da kuɗaɗe domin tallafawa ayyukan ta’addanci.

5. Sa'o'i 3 da suka wuceAn kashe ƴan jarida uku a wani harin da Isra'ila ta kai a Gaza

   Ma’aikatan bayar da agajin gaggawa sun ce an kashe falasɗinawa ƴan jarida guda uku a wani harin da Isra'ila ta kai a tsakiyar Gaza.

   Hukumar kare haƙƙin farar hula a Gaza ta ce an kashe ƴan jaridan ne bayan an kai wa motarsu hari a yankin al-Zahra inda ta bayyana sunayensu da Mohammed Salah Qashta da Anas Ghneim da kuma Abdul Raouf Shaat. An fahimci cewa suna aiki ne da wata ƙungiyar agaji ta Masar.

   Rundunar sojin Isra'ila ta ce ta kai hari kan wasu da ake zargi da yin amfani da wani jirgi mara matuki da ke da alaka da Hamas... ta hanyar da ke barazana ga dakarunta. Inda ta ƙara da cewa tana kan gudanar da bincike kan lamarin.

   Ma'aikatar lafiya ta Hamas ta sanar da cewa, an kashe wasu mutane takwas, biyu daga cikinsu yara kanana da makaman atilare na Isra'ila a Gaza a ranar Laraba.

   Likitoci sun ce mutane uku ciki har da wani yaro ɗan shekara 10, sun mutu sakamakon Harbin da tankokin yaƙin Isra'ila suka yi a wani wuri a tsakiyar Gaza, kuma wani yaro dan shekara 13 da wata mata sun mutu sakamakon harbin da sojojin Isra'ila suka yi a kudancin yankin Khan Younis, a cewar kamfanin dillancin labarai na Reuters.

   Aƙalla Falasdinawa 466 ne aka kashe a Gaza tun bayan da aka fara tsagaita wuta tsakanin Isra'ila da Hamas a ranar 10 ga Oktoba, a cewar ma'aikatar lafiya.

6. Sa'o'i 3 da suka wuce'Ba zan huta ba, sai mun ceto mutanenmu da aka sace'

   Gwamnan jihar Kaduna Malam Uba Sani ya ce gwamnatinsa za ta yi duk abin da ya dace domin ceto mutanen da aka yi garkuwa da su a ƙauyen Kurmin Wali da ke ƙaramar hukumar Kajuru ta jihar.

   Gwamnan ya ce yana bibiyar ƙoƙarin da jami'an tsaro ke yi game da batun, kuma ba zai gajiya ba har sai an yi nasarar ceto dukkan mutanen da aka sace.

   A ranar Lahadi wasu mahara suka shiga ƙauyen Kurmin Wali inda rahotanni ke cewa sun yi garkuwa da mutane fiye da 170 tare da jefa al'ummar yankin cikin ruɗani.

   Da farko ƴansanda da jami'an gwamnatin jihar Kaduna sun musanta faruwar lamarin amma daga baya suka fitar da sanarwar da ke tabbatar da shi, duk da cewa kawo yanzu babu haƙiƙanin bayani kan ko mutane nawa ne aka sace a ƙauyen.

   Amma a hirar shi da BBC a Kaduna, gwamna Uba Sani ya ce gwamnatinsa ta karkata ne ga aikin ceto mutanen, don haka sanin yawan su wani abu ne da zai iya zuwa daga baya domin a cewarsa masu ''siyasantar'' da batun tsaro ne ke mayar da hankali kan yawan mutanen da aka sace.

   Karanta cikakken labarin

7. Sa'o'i 4 da suka wuceTrump ya ce an tattauna tsarin yarjejeniya kan Greenland bayan ya janye barazanar ƙaƙaba haraji

   Shugaba Donald Trump ya ce Amurka na nazarin yiwuwar ƙulla yarjejeniya kan Greenland bayan tattaunawa da ƙungiyar tsaro ta NATO yayin da ya janye barazanar sanya haraji kan ƙawayensa na Turai da suka yi adawa da shirin Amurka na mallakar tsibirin.

   A saƙonnin da ya wallafa a shafukan sada zumunta, Trump bai bayar da cikakkun bayanai game da tattaunawar tsakaninsa da NATO ba, amma ɓangarorin biyu sun bayyana tattaunawar a matsayin "mai matuƙar tasiri".

   Sai dai babu wani abin da ya yi nuni da cimma yarjejeniyar da za ta biya buƙatar Trump na "mallakar" Greenland, burin da ya sake jaddadawa a taron tattalin arzikin duniya a Switzerland, yayin da ya yi watsi da batun amfani da ƙarfin soja.

   Bayan ganawa da Sakatare Janar na NATO Mark Rutte a Switzerland, Trump ya shaidawa manema labarai cewa akwai yiwuwar yarjejeniyar za ta iya ƙunsar batun mallakar ma'adinan da ke tsibirin.

8. Sa'o'i 4 da suka wuceAssalamu alaikum

   Masu bibiyar shafin BBC Hausa kai-tsaye barkanmu da safiyar wannan rana ta Alhamis.

   Kamar kullum, yau ma za mu kawo muku abubuwan da ke faruwa a Najeriya da sauran sassan duniya.

   Za ku iya leƙawa shafukan sada zumuntanmu na intanet, da facebook da X da kuma whatsapp domin karanta sauran labarai da kallon bidiyo da tafka muhawara kan labaran da mu ke wallafawa.