એન્ટાર્કટિકાનો આવો નજારો તમે ક્યારેય નહીં જોયો હોય!

વાતાવરણમાં થતાં પરિવર્તનોને કારણે એન્ટાર્કટિકાની સુંદર દુનિયા કેવી દેખાય છે?

અહીં રહેતાં પ્રાણીઓની પરિસ્થિતિ જાણવા માટે વર્ષ 2018ની શરૂઆતમાં રૉયટર્સના ફોટોજર્નલિસ્ટ એલેક્ઝાન્ડર મેનેઘીનીએ આ વિસ્મયભરી દુનિયાની મુલાકાત લીધી હતી.

ગ્રીનપીસ દ્વારા આયોજીત આ સફરનો ઉદ્દેશ યુરોપિયન યુનિયનની દરખાસ્ત હેઠળ એક સંરક્ષિત વિસ્તાર બનાવવાનો હતો. જ્યાં દરિયાઈ પ્રાણીઓ અને વનસ્પતિ સલામત રીતે રહી શકે.

ચાર દિવસ સુધી પ્રવાસ કર્યા બાદ, મેનેઘીની આ મહાદ્વીપ પર પહોંચ્યા હતા. જ્યાં તેમણે વહેલ, પેન્ગ્વિન અને વિશાળ હિમનદીઓ જોઈ હતી.

'વેડેલ સી મરીન પ્રોજેક્ટ એરિયા' હેઠળ 1.1 મિલિયન ચોરસ માઈલ મોટો વિસ્તાર હશે. જેમાં વહેલ, સીલ, પેન્ગ્વિન અને વિવિધ માછલીઓ સહિત અનેક દરીયાઈ જીવોને સંરક્ષણ મળી રહેશે.

જો આ યોજના સફળ થઈ તો તે વિશ્વનો સૌથી મોટો સંરક્ષિત વિસ્તાર હશે.

ચિલીમાં આવેલા પુંટા અરીના શહેરથી મુસાફરીની શરૂઆત કર્યા બાદ અભ્યાસ કરનારી ટીમે આબોહવામાં થઈ રહેલું પરિવર્તન, પ્રદૂષણ અને માછલી ઉદ્યોગની અસરોનો અભ્યાસ કરવાનું શરૂ કરી દીધું છે.

આ યોજનાની આગેવાની લેનારા ટૉમ ફોરમેને કહ્યું, "એન્ટાર્કટિકા હજુ પણ સંધિ હેઠળ નુકસાનથી સુરક્ષિત છે, પરંતુ આસપાસના વિસ્તારોમાં નુકસાન થવાની શક્યતા છે. આવી પરિસ્થિતિમાં આવા વિસ્તારોને સુરક્ષિત કરવાની જે તક છે, તેમાં ચૂક ન થવી જોઈએ."

પેન્ગ્વિન સિવાય, ટીમને હેલિકૉપ્ટરથી સીલ જોવાની તક પણ મળી હતી.

અભ્યાસ કરનારી ટીમે કર્વવિલે દ્વીપ, હાલ્ફ મૂન ખાડી, દેંકો દ્વીપ, નેકો બંદર અને હીરો ખાડીની મુલાકાત લીધી હતી.

ટીમે એન્ટાર્કટિકાના ડિસેપ્શન દ્વીપની મુલાકાત પણ લીધી હતી. જ્યાં એક સક્રિય જ્વાળામુખી પણ છે. દ્વીપમાં એક જૂની ફૅક્ટરી અને કબ્રસ્તાન હતું.

મેનેઘીનીનું કહેવું હતું, "લોકોની માન્યતાથી વિપરીત પેન્ગ્વિનની અનેક પ્રજાતિઓ, સીબર્ડ, સીલ- વહેલ ઘણી વાર એન્ટાર્કટિકામાં જોવા મળે છે."

તેઓ કહે છે, "પેન્ગ્વિન સાથેની મારી મુલાકાત ખૂબ જ સુંદર અને ક્યારેય ન ભૂલાય તેવો અનુભવ હતો. મને લાગે છે કે મારા કૂતરા સિવાય, તે દુનિયાના સૌથી સુંદર પ્રાણીઓ છે."

મેનેઘીની કહે છે કે તેમના દ્વારા લીધેલી તસવીરો નરી આંખે જોવા મળતા નજારા જેવી તો નહીં જ લાગે.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો