'ડબલ બેડરૂમના ફ્લેટમાં 20 લોકો રહેતા', લંડનમાં વિદેશી વિદ્યાર્થીઓને કેવી કેવી મુશ્કેલી પડે છે?
ઇમેજ સ્રોત, HANDOUT
- લેેખક, તારાહ વેલ્શ
- પદ, બીબીસી લંડન
જ્યારે નજમુશ શહાદત બાંગ્લાદેશથી લંડન અભ્યાસાર્થે આવ્યા ત્યારે તેમને ખ્યાલ ન હતો કે તેમને ક્યાં રહેવાનું છે.
તેમને કાયદાના એક અભ્યાસક્રમમાં એડમિશન મળ્યું હતું. પરંતુ યુનિવર્સિટીમાં રહેવું એ ખૂબ મોંઘું હતું. તેમને બહાર પણ રહેવા માટે કોઈ ઠેકાણું મળ્યું નહીં.
થોડા દિવસોમાં પરિસ્થિતિ વધુ ખરાબ થઈ ગઈ અને તેમને એક ડબલ બેડરૂમ ફ્લેટમાં 20 લોકો સાથે રહેવાનો વારો આવ્યો.
“મેં ક્યારેય વિચાર્યું ન હતું કે મારે આવી જગ્યાએ રહેવાનું આવશે. મને હજુ પણ એ દિવસો યાદ આવે છે.”
દરેક રૂમ જાણે કે પથારીઓથી ભરેલો હતો. દરેક લોકો અલગ-અલગ શિફ્ટમાં કામ કરતા હતા. અવરજવર કાયમ ચાલુ જ રહેતી હતી, જેના કારણે ક્યારેય સારી ઊંઘ પણ થતી ન હતી.
“શરૂઆતમાં હું ઘરે વીડિયો કૉલ પણ કરતો ન હતો. હું ઇચ્છતો ન હતો કે મારા ઘરે કોઈને ખબર પડે કે હું આવી જગ્યાએ રહું છું.”
શહાદત અત્યારે કેટલાક બીજા લોકો સાથે ભાડાના મકાનમાં રહે છે પરંતુ તેમાં તેમની પાસે અલગથી તેમનો રૂમ છે.
તેમનું કહેવું છે કે વિદેશથી આવેલા વિદ્યાર્થીઓ માટે લંડનમાં ભાડા પર ઘર લેવું એ ખૂબ અઘરું છે. વિદ્યાર્થીઓનું ઓળખીતું કોઈ અહીં રહેતું નથી.
End of સૌથી વધારે વંચાયેલા સમાચાર
ઘણા લોકો ઘરેથી મળેલા પૈસાને ફી માટે ખર્ચી નાખે છે. તેમણે કહ્યું કે ત્રણ વર્ષના મારા કોર્સની ફી અંદાજે 39 હજાર પાઉન્ડ એટલે કે 39 લાખથી વધુ છે.
શહાદતે કહ્યું, “મેં મારાં માતાપિતાનાં અને મારાં સ્વપ્નો પૂરાં કરવાં માટે મારા પરિવારની બચત ખર્ચી નાખી.”
સ્થાનિક કરતાં વિદેશી વિદ્યાર્થીઓનું પ્રમાણ વધુ
બ્રિટનમાં ઉચ્ચ શિક્ષણ સંસ્થાઓમાં અભ્યાસ કરવા વિદેશથી આવતા વિદ્યાર્થીઓની સંખ્યામાં વધારો થાય એ માટે ત્યાંની સરકાર ઘણાં વર્ષોથી કામ કરી રહી છે.
હાયર એજ્યુકેશન સ્ટેટિસ્ટિક્સ એજન્સી (HESA) અનુસાર, 2015-16માં લંડનમાં 1,13,015 વિદેશી વિદ્યાર્થીઓ હતા અને 2020-21 સુધીમાં આ સંખ્યા 59 ટકા વધીને 1,79,425 થઈ ગઈ છે.
લંડનની કેટલીક સંસ્થાઓમાં હાલમાં સ્થાનિક વિદ્યાર્થીઓ કરતાં વધુ વિદેશી વિદ્યાર્થીઓ છે.
ભારતના રાશવ કૌશિક પણ ત્યાં કાયદાનો અભ્યાસ કરે છે. તેમણે કેટલાક મિત્રો સાથે મકાન ભાડે રાખ્યું છે. તેઓ પોતાનો બેડરૂમ કોઈ બીજા સાથે શેર કરી રહ્યા છે.
તેમણે કહ્યું કે ઘર માટે 16 હજાર પાઉન્ડ (લગભગ 16 લાખ રૂપિયા) એડવાન્સ ચૂકવવા ઉપરાંત કોઈ અન્ય વ્યક્તિને ગૅરન્ટર તરીકે ઊભા રહેવું પડ્યું, જે તેમના માટે એક મોટો બોજ બની ગયો.
યુનિવર્સિટીની ક્ષમતા કરતાં વધુ પ્રવેશ
ઇમેજ સ્રોત, HANDOUT
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
નેશનલ યુનિયન ઑફ સ્ટુડન્ટ્સ (NUS)ના નેહલ બાજવાએ જણાવ્યું હતું કે, "યુનિવર્સિટીઓ ઊંચી ફીને આવરી લેવા માટે વધુ વિદેશી વિદ્યાર્થીઓને પ્રવેશ આપવાનો પ્રયાસ કરી રહી છે. કેટલીક યુનિવર્સિટીઓ તેમની ક્ષમતા કરતાં પણ વધુ લોકોને પ્રવેશ આપી રહી છે."
એનયુએસ ઘરના ભાડાને નિયંત્રિત કરવા માગે છે. એવું પણ કહેવાઈ રહ્યું છે કે આ ભાડાના કારણે ખાસ કરીને વિદેશી વિદ્યાર્થીઓને આર્થિક નુકસાન થઈ રહ્યું છે.
બાજવાએ કહ્યું, "તેઓ તમારું શોષણ કરી રહ્યા છે, કારણ કે તમે તમારા અધિકારો વિશે જાણતા નથી."
કોઈ પણ કરાર વિના મકાન ભાડે આપવા ઉપરાંત, વિદેશી વિદ્યાર્થીઓએ મોટી ઍડવાન્સ ચુકવણી કરવી પડે છે અને જો તેમને ગમતી ન હોય તેવી પણ શરતો સ્વીકારવી પડે છે, એમ તેમણે જણાવ્યું હતું.
તેમણે કહ્યું કે "જો કોઈ ઘર ન હોય તો મારે ક્યાં રહેવું? વધુ પડતું વિચારવાને કારણે ઉતાવળ થવાની પણ સંભાવના છે, કારણ કે રહેવા માટે ઘર ન હોવું એ ખરેખર મુશ્કેલ છે."
ઈટાલીનાં 19 વર્ષીય ગિયુલિયા તારટારિસી ફિલ્મનો કોર્સ કરી રહ્યાં છે. હાલમાં તે તેમના મિત્રો મેસી અને લિડિયા સાથે રહે છે. જોકે, ગયા વર્ષે તેમણે લંડનમાં રહેઠાણ શોધવા માટે આકરો સંઘર્ષ કર્યો.
તેમણે કહ્યું, "આ ખૂબ સંવેદનશીલ મામલો છે. હું રહેઠાણનો કોઈ વિકલ્પ શોધ્યા વિના સીધી જ અહીં આવી ગઈ. ઘર શોધતા પહેલાં એક મહિના સુધી મારા મિત્રના રૂમમાં રહી. પછી હું થોડી તણાવમાં આવી ગઈ."
સ્થાનિક વિદ્યાર્થીઓને પણ પડે છે તકલીફ
ઇમેજ સ્રોત, Getty Images
જોકે, આ માત્ર વિદેશી વિદ્યાર્થીઓને જ પડતી તકલીફ છે એવું જરાય નથી. બ્રિટનના વિદ્યાર્થીઓએ પણ બીબીસીને જણાવ્યું છે કે તેઓ પણ આ જ સ્થિતિનો સામનો કરી રહ્યા છે.
તેમનું કહેવું છે કે ઘર શોધવા સિવાય પણ તેમને યુનિવર્સિટી સુધી જવા માટે પણ લાંબું અંતર કાપવું પડે છે.
સેવિલ્સ દ્વારા કરવામાં આવેલા અભ્યાસમાં જાણવા મળ્યું છે કે લંડનમાં વિદ્યાર્થીઓના આવાસની વાત કરીએ તો બેડદીઠ 3.8 વિદ્યાર્થી હતા, જે યુકેની સરેરાશ 2.9ની સરખામણીમાં ઘણા વધારે હતા.
વિદ્યાર્થીઓને સસ્તાદરે આવાસની સુવિધા ઉપલબ્ધ હોવી જોઈએ. વિદ્યાર્થી ચેરિટી સંસ્થા યુનિપોલ માને છે કે યુનિવર્સિટીઓમાં આ પ્રકારની સુવિધાઓ ઉપલબ્ધ હોવી જોઈએ. ખાસ કરીને જેમની પાસે વધુ નાણાકીય ક્ષમતા નથી અને જેઓ વિદેશથી આવે છે તેમને અહીંની પરિસ્થિતિની જાણ નથી.
કંપનીના સીઇઓ માર્ટિન બ્લેકીએ જણાવ્યું હતું કે, "મકાનમાં રૂમ ભાડે રાખવાની સરખામણીમાં, યુનિવર્સિટીમાં રહેવાની કિંમત લગભગ 35 ટકા વધારે છે. તેથી, વિદ્યાર્થીઓ મકાન ભાડે લે છે અને તેને અન્ય લોકો સાથે શેર કરે છે. કદાચ તેનાથી તેઓ નાણાં બચાવી શકે છે."
જોકે, ઘણા લોકો ઘર શોધી શકે તે પહેલાં જ તેમની પાસે રહેલા પૈસા ખતમ થઈ જાય છે. પરિણામે, ઘણા વિદેશી વિદ્યાર્થીઓ તેમના બચેલા પૈસા ભોજન પર ખર્ચ કરે છે. અમુક પરિસ્થિતિમાં તેમને ઘરે પાછા જવાનો પણ વારો આવે છે.
માર્ટિને કહ્યું, "તે ખરેખર મુશ્કેલ પરિસ્થિતિ હતી, જેના કારણે ઘણા લોકોનાં સપનાં તૂટી રહ્યાં છે."
"યુનિવર્સિટીઓ માટે એ અગત્યની વાત છે કે વિશ્વભરના વિવિધ દેશોમાંથી હોશિયાર વિદ્યાર્થીઓ અહીં અભ્યાસ કરવા આવે છે, જે દેશને વિકાસ તરફ દોરી જાય છે."
ડિપાર્ટમેન્ટ ફૉર એજ્યુકેશન (ડીએફઇ)ના પ્રવક્તાએ એક નિવેદનમાં જણાવ્યું હતું કે, " જરૂરિયાત મુજબ અમે વિદ્યાર્થીઓની રહેઠાણની જરૂરિયાતોને પહોંચી વળવા માટે યુનિવર્સિટીઓ અને આવાસ સેવાઓના ખાનગી માલિકોને પણ પ્રોત્સાહિત કરીએ છીએ."
"રહેઠાણની સુવિધાની અછત માત્ર વિદ્યાર્થીઓ માટે જ નથી. સમગ્ર બ્રિટનમાં આ સ્થિતિ છે. અમે શક્ય તેટલો તેના પર કાબૂ મેળવવાનો પ્રયાસ કરી રહ્યા છીએ."
યુનિવર્સિટીઓ વિદ્યાર્થીઓને મદદ કરવાનો પ્રયાસ કરી રહી છે. અમે એવી ભલામણ કરવામાં આવે છે કે વિદ્યાર્થીઓ રહેઠાણ શોધ્યા પછી જ અહીં આવે.
યુકેની યુનિવર્સિટીઓ કહે છે, "જેમને પણ આવાસ શોધવામાં મુશ્કેલી આવી રહી છે તેમણે યુનિવર્સિટીઓમાં તેના માટે સ્થાપિત ટીમોનો સંપર્ક કરવો જોઈએ અને તેઓ શક્ય તેટલી ઝડપથી સમસ્યાનો ઉકેલ લાવવાનો પ્રયાસ કરશે."
