ગુજરાતમાં કમોસમી વરસાદ : કયા જિલ્લાઓમાં વરસાદની આગાહી?
ઇમેજ સ્રોત, Getty Images
- ગુજરાતમાં 4થી 9 તારીખ સુધી વરસાદ પડવાની આગાહી કરવામાં આવી છે
- રાજસ્થાન અને ગુજરાતની આસપાસ ઉત્તરથી દક્ષિણ તરફ એક ટ્રફ રેખા બનશે જેના કારણે અનેક વિસ્તારોમાં કમોસમી વરસાદ પડવાની શક્યતા છે
- જીરા, રાયડો, ધાણા, ઘઉં, ચણા સહિતના પાકો તૈયાર થઈને ખેતરોમાં પડ્યા છે તેને આ વરસાદને કારણે નુકસાન થવાનો ખેડૂતોને ભય સતાવી રહ્યો છે
- આણંદ, વડોદરા, દાહોદ, છોટા ઉદેપુર, સુરત, નવસારી, વલસાડ, અમરેલી, ભાવનગર, ગીર-સોમનાથ અને કચ્છ જિલ્લાના કેટલાક વિસ્તારોમાં ચારથી પાંચ દિવસ સુધી છુટાછવાયા વરસાદની આગાહી કરવામાં આવી છે
ગુજરાતમાં આગામી દિવસોમાં કેટલાક જિલ્લાઓમાં વરસાદ પડવાની આગાહી કરવામાં આવી છે. ગુજરાતમાં 4થી 9 માર્ચ સુધી વરસાદ પડવાની આગાહી કરવામાં આવી છે.
હવામાન વિભાગના જણાવ્યા પ્રમાણે રાજસ્થાન અને ગુજરાતની આસપાસ ઉત્તરથી દક્ષિણ તરફ એક ટ્રફ રેખા બનશે જેના કારણે અનેક વિસ્તારોમાં કમોસમી વરસાદ પડવાની શક્યતા છે.
દક્ષિણ ગુજરાત, સૌરાષ્ટ્ર, પૂર્વ ગુજરાતના કેટલાક વિસ્તારો તથા કચ્છના કેટલાક વિસ્તારોમાં આગામી દિવસોમાં હવામાન બદલાશે અને વરસાદ પડવાની શક્યતા છે.
રાજ્યમાં હાલ રવી પાકની લણણીનો સમય ચાલી રહ્યો છે અને જીરા, રાયડો, ધાણા, ઘઉં, ચણા સહિતના પાકો તૈયાર થઈને ખેતરોમાં પડ્યા છે. આ વરસાદને કારણે ખેડૂતોને નુકસાન થવાનો ભય સતાવી રહ્યો છે.
ગુજરાતના કયા જિલ્લાઓમાં કમોસમી વરસાદની શક્યતા?
ઇમેજ સ્રોત, Getty Images
હાલ દેશમાં પ્રિ-મૉન્સુન સિઝનની શરૂઆત થઈ ગઈ છે એટલે કે આ ગાળામાં પડતા વરસાદને ચોમાસા પહેલાંનો વરસાદ ગણવામાં આવે છે.
માર્ચ-એપ્રિલ-મે મહિનાને પ્રિ-મૉન્સુન ગણવામાં આવે છે. હવામાન વિભાગ અનુસાર ગુજરાતના આણંદ, વડોદરા, દાહોદ, છોટા ઉદેપુર, સુરત, નવસારી, વલસાડ, અમરેલી, ભાવનગર, ગીર-સોમનાથ અને કચ્છ જિલ્લાના કેટલાક વિસ્તારોમાં ચારથી પાંચ દિવસ સુધી છુટાછવાયા વરસાદની આગાહી કરવામાં આવી છે.
છુટાછવાયો વરસાદ એટલે કે સમગ્ર જિલ્લામાં વરસાદ નહીં પડે પરંતુ કોઈ કોઈ સ્થળોએ વરસાદ પડવાની શક્યતા છે. હવામાન વિભાગ પ્રમાણે 4થી 7 તારીખ સુધી હળવાથી મધ્ય વરસાદની શક્યતા દેખાઈ રહી છે.
જોકે, 9 તારીખ સુધી ગુજરાતમાં વાદળછાયું હવામાન રહેવાની શક્યતા છે. ગુજરાતમાં હાલ ઉનાળાની શરૂઆત થઈ રહી છે અને ગુજરાતમાં હાલના દિવસોમાં જ તાપમાન સરેરાશ 35 ડિગ્રીથી વધારે જોવા મળી રહ્યું છે.
End of સૌથી વધારે વંચાયેલા સમાચાર
ગુજરાતની સાથે-સાથે રાજસ્થાન, પશ્ચિમ મધ્ય પ્રદેશ, મહારાષ્ટ્રના કેટલાક વિસ્તારોમાં પણ વરસાદ પડવાની શક્યતા છે.
ગુજરાતમાં માર્ચ મહિનામાં શા માટે વરસાદ?
ઇમેજ સ્રોત, Getty Images
હવામાન વિભાગના જણાવ્યા પ્રમાણે ગુજરાતની આસપાસ ઉત્તરથી દક્ષિણ તરફ એક ટ્રફ રેખા બનશે અને તેના કારણે રાજ્યમાં વરસાદી ગતિવિધિઓ શરૂ થશે. જ્યારે વધારે ગરમી પડે ત્યારે ગાજવીજ સાથે વરસાદ પડવાની શક્યતા વધી જાય છે.
તાપમાન વધારે હોય ત્યારે ગરમ અને ભેજવાળી હવા ઉપર ઊઠે છે અને ઉપર જઈને તે ઠંડી પડે છે. તાપમાન ઘટતા ભેજ પાણીમાં ફેરવાઈ જાય છે. આ ઠંડી થયેલી હવા નીચે તરફ આવે છે ફરી ગરમ થાય છે અને ઉપર ઊઠે છે.
આ પ્રક્રિયા સતત ચાલે અને તેમાં વધારે પ્રમાણમાં ભેજ હોય અને હવાનો જથ્થો પણ પુષ્કળ હોય ત્યારે વરસાદ પડે છે. ગુજરાતમાં હાલ ઘણા વિસ્તારોમાં બંગાળની ખાડી પરથી પવન આવશે જે ભેજ લઈને આવે છે આ ભેજ અને ગરમ હવા ભેગી થતા વરસાદી ગતિવિધિ શરૂ થવાની શક્યતા છે.
તાપમાનમાં શું થશે ફેરફાર?
ગુજરાતમાં આ વર્ષે ફેબ્રુઆરી મહિનાથી જ ભારે ગરમી પડવાની શરૂઆત થઈ ગઈ છે. ફેબ્રુઆરી મહિનામાં ઘણા વિસ્તારોનું તાપમાન 38 ડિગ્રી સેલ્સિયસ સુધી પહોંચી ગયું હતું જ્યારે ભૂજમાં એક દિવસ તાપમાન 40 ડિગ્રી સેલ્સિયસ નોંધાયું હતું.
માર્ચ મહિનાની શરૂઆત અપેક્ષા પ્રમાણે ભારે ગરમીથી જ થઈ છે અને આવનારા દિવસોમાં પણ ગરમી વધવાની શક્યતા છે. આ વર્ષે ઉનાળો વધારે ગરમ રહે તેવી શક્યતા દેખાઈ રહી છે.
હવામાન વિભાગે પણ કહ્યું છે કે આ વર્ષે સામાન્ય કરતાં 3થી 4 ડિગ્રી સેલ્સિયસ તાપમાન વધારે રહેવાની શક્યતા છે.
હાલ ગુજરાતના તાપમાનમાં હાલ કોઈ મોટા ફેરફાર થવાની શક્યતા નથી પરંતુ એકાદ બે દિવસ સુધી તાપમાન 32થી 37 ડિગ્રીની વચ્ચે રહેવાની સંભાવના છે.
