Ballon d'Or: Lionel Messi yatsindiye igihembo cy'umukinnyi urusha abandi ku isi muri ruhago ku nshuro ya karindwi.

Rutahizamu wa Paris St-Germain na Argentine Lionel Messi yatwaye Ballon d'Or - ihabwa umukinnyi urusha abandi ku isi mu mupira w'amaguru mu mwaka, ku nshuro ya karindwi.

Messi, w'imyaka 34, yafashije igihugu cye gutwara igikombe cya Copa America, ari nacyo gikombe cya mbere yatwaye ku rwego mpuzamahanga, kandi yatsinze ibitego 40 muri shampiyona ya 2021. Yatsindiye Barcelona 28, atsindira Paris Saint Germain 4 naho Argentine ayitsindira 8.

Rutahizamu wa Bayern Munich akaba afite n'ubwenegihugu bwa Polonye, Robert Lewandowski yaje ku mwanya wa kabiri, Jorginho ukinira Chelsea n'Ubutaliyani aza ku mwanya wa gatatu naho Karim Benzema wa Real Madrid n'Ubufaransa aza ku mwanya wa kane.

Igihembo cya Ballon d'Or gitorerwa n'abanyamakuru 180 ku isi yose, ariko nta gihembo cyatanzwe muri 2020 kubera icyorezo cya Coronavirusi.

Hagati ya 2008 na 2019 iki gihembo cyihariwe na Messi cyangwa Christiano Ronaldo (wagitwaye inshuro 5), usibye muri 2018 cyatwawe na Luka Modric wa Croatia.

Messi yaramaze gutwara iki gihembo inshuro nyinshi kurusha abandi bakinnyi bose ku isi none icya 2021 atsindiye ku nshuro ya karindwi iciye agahigo, gikurikiye ibindi yatwaye muri 2009, 2010, 2011, 2012, 2015 na 2019.

Mu muhango wabereye i Paris ahitwa Theatre du Chatelet, Messi yagize ati:

"Biratangaje kuba kongera kuba hano"

"Mu myaka ibiri ishize nari nzi ko ari yo nshuro ya nyuma. Abantu bari batangiye kumbaza igihe nzagira mu zabukuru ariko ubu ndi hano i Paris kandi ndishimye."

"Ni umwaka wihariye kuri jye kubera iki gihembo cya Copa America. Gutsinda [Brazil 1-0 ku mukino wa nyuma] kuri stade ya Maracana kandi nishimanye n'abantu bo muri Argentine."

"Sinzi niba ari ari wo mwaka mwiza kurusha indi --nagize umwuga igihe kirekire, ariko wari umwaka wihariye no gutwara igikombe ndi kumwe na Argentine nyuma y'ibihe bikomeye no kunengwa."

Messi kandi yanavuze amagambo meza kuri kapiteni wa Polonye, Lewandowski w'imyaka 33 waje ku mwanya wa kabiri.

Messi yagize ati:

"Ndashaka kubwira Robert ko ari icyubahiro guhatana [kuri ballon d'Or] nawe."

"Yagombaga kugitwara mu mwaka ushize."

Lewandowski yatsinze ibitego 53 mu marushanwa yose ya 2021 Bayern yakinnye kandi yahawe igihembo cya rutahizamu w'umwaka, ni igihembo gishya cyatangajwe amasaha macye mbere y'ibirori.

Umunyezamu wa Paris St-Germain, Gianluigi Donnarumma, wafashije Ubutaliyani gutwara igikombe cy'Uburayi cya Euro 2020, yahawe igihembo cyiswe Yashin Trophy nk'umunyezamu urusha abandi mu gihe Chelsea yatwaye Champions League yabaye ikipe y'umwaka.

Abakinnyi 14 muri 30 bari ku rutonde rwa nyuma rwa Ballon d'Or ubu bakina muri shampiyona y'Ubwongereza, Premier League.

Chelsea yari ihagarariwe n'abakinnyi batanu, barimo Jorginho wabaye uwa gatatu ari kumwe na N'Golo Kante wa gatanu, Romelu Lukaku wa 12, Mason Mount wa 19 na Cesar Azpilicueta ku mwanya wa 29 yasangiye n'undi mukinnyi.

Manchester City yatwaye igikombe cya shampiyona cy'umwaka ushize nayo yari ifite abakinnyi bangana n'aba Chelsea. Kevin de Bruyne yaje ku mwanya wa munani, Raheem Sterling ku mwanya wa 15, Riyad Mahrez ku mwanya wa 20, Phil Foden ku mwanya wa 25 Riuben Dias ku mwanya wa 26.

Abakinnyi babiri ba Manchester United Christiano Ronaldo na Bruno Fernandez nabo bari ku rutonde rwa nyuma ku mwanya wa gatndatu na 21.

Mohamed Salah wa Liverpool yabaye uwa karindwi naho Harry Kane wa Tottenham aba uwa 23.

Urutonde rwose rwa Ballon d'Or

1. Lionel Messi (Paris St-Germain/Argentine, rutahizamu)

2. Robert Lewandowski (Bayern Munich/Polonye, rutahizamu)

3. Jorginho (Chelsea/Ubutaliyani, akina hagati)

4. Karim Benzema (Real Madrid/Ubufaransa, rutahizamu)

5. N'Golo Kante (Chelsea/Ubufaransa, akina hagati)

6. Cristiano Ronaldo (Manchester United/Portugali, rutahizamu)

7. Mohamed Salah (Liverpool/Misiri, rutahizamu)

8. Kevin de Bruyne (Manchester City/Ububiligi, akina hagati)

9. Kylian Mbappe (Paris St-Germain/Ubufaransa, rutahizamu)

10. Gianluigi Donnarumma (Paris St-Germain/Ubutaliyani, umunyezamu)

11. Erling Braut Haaland (Borussia Dortmund/Norveje, rutahizamu)

12. Romelu Lukaku (Chelsea/Ububiligi, rutahizamu)

13. Giorgio Chiellini (Juventus/Ubutaliyani, myugariro)

14. Leonardo Bonucci (Juventus/Ubutaliyani, myugariro)

15. Raheem Sterling (Manchester City/Ubwongereza, rutahizamu)

16. Neymar (Paris St-Germain/Brazil, rutahizamu)

17. Luis Suarez (Atletico Madrid/Uruguay, rutahizamu)

18. Simon Kjaer (AC Milan/Denmarke, myugariro)

19. Mason Mount (Chelsea/Ubwongereza, akina hagati)

20. Riyad Mahrez (Manchester City/Aljeriya, rutahizamu)

21. Bruno Fernandes (Manchester United/Portugali, akina hagati), yanganyije na Lautauro Martinez (Inter Milan/Argentine, rutahizamu) -

23. Harry Kane (Tottenham/Ubwongereza, rutahizamu)

24. Pedri (Barcelona/Espanye, akina hagati)

25. Phil Foden (Manchester City/Ubwongereza, rutahizamu)

26. Nicolo Barella (Inter Milan/Ubutaliyani, akina hagati), yanganyije na Ruben Dias (Manchester City/Portugali, myugariro) na Gerard Moreno (Villarreal/Espanye, rutahizamu)

27. -

28. -

29. Luka Modric (Real Madrid/Croatia, akina hagati), yanganyije na Cesar Azpilicueta (Chelsea/Espanye, myugariro)

30. -