Barcelona 0-3 Bayern Munich: Thomas Muller yaraye asubiye guhumira Barca yari yakiriye Bayern

Ibitsindo vya Thomas Muller na Robert Lewandowski ni vyo vyabanguranije iyi mirwi ibiri y'ibihangange mw'ihiganwa rihuza imirwi yabaye iya mbere i Bulaya mu murwi E, mu rukino rwa mbere rwatsinzwe na Bayern Munich yari yakiriwe na Barcelona.

Uyu murwi watahukanye ihiganwa ry'Ubudagi ry'umwaka uheze wafashe mu minwe uru rukino, Muller akaba yanashoboye kwinjiza igitsindo kigize indwi atsinze Barcelona.

Lewandowski niwe yatsindagiye, mu gutsinda ibitsindo bibiri vyose, aho yatanguye kwinjiza igitsindo ciwe ca 74 muri Champions League ku mupira watewe ugakubita kw'igori ukamugarukako agaca yinjiza igitsindo igori riri gusa, inyuma y'uko umunyegori Jamal Musiala yirashe ku ruhande akurikirana umupira igori rigasigara rigaragara.

Muri uru rukino rwa mbere rwa Champions League ikinye kuva inyenyeri yayo Lionel Messi ayisezeye, Barca vyaranse, irarushwa cane, gushika n'aho atigeze ishobora gutera mw'igori.

Barcelona itakaje urukino rwa gatatu iri ku kibuga cayo incuro zitatu yikurikiranya mu mahiganwa ya Bulaya, ubwa mbere muri kahise kayo.

Yararushijwe cane na Bayern, n'aho na yo nyene itakinye urukino rukomeye cane nk'uko abantu bari bayizi.

Uyu murwi w'Ubudagi ni wo ufata ikibanza ca mbere mu murwi E, mu gihe urundi rukino hagati ya Benfica na Dinamo Kiev rwarangiye ari 0-0.

'Turi uko tumeze, ni uko nyene'

Hari haciye amezi 13 kuva Bayern ibagiye ibisiga uyu murwi, icashize aheru ibibazo vyatera vyiyongera muri Barcelona, mu rukino rwarangiye Bayern inyagiye Barcelona ibitsindo umunani vyose kuri bibiri.

Barcelona ntiyamenya ko ibintu vyari kugenda vyunyuka mu mezi yakurikiye, aho mbere ibibazo vy'amafaranga vyatumye Lionnel Messi ata akagenda, akimukira muri Paris St-Germain muri rino ci.

Ubu isa n'ikibarara c'ikintu cigeze kuba gikomeye kera - igenda itabona iyo iriko iraja, yiteze kubona amarushwa mu gihe yohura n'umurwi wipanze neza, umurwi wo ku rwego mpuzamakungu nk'uko vyaraye biyigendeye kuri Bayern Munich nijoro.

Igihe ikubitwa 8-2 Messi yakinanye na Luis Suarez nk'abasatirizi, hari mu 2020. Mu rukino rwa nijoro, Barca yakinishije abasatirizi bahoze bakina muri Premier League y'Ubwongereza, Memphis Depay na Luuk de Jong, kubera Martin Braithwaite yavunitse.

Bayern yasa n'uko ataco yinona n'aho rimwe na rimwe yabura umupira, ariko iramutse igiye imbere, vyaba ngombwa ko Barcelona yisanga uruhande rw'inyuma iriko ikinisha batanu hakuba batatu isanzwe ikinisha.

Gerard Pique, umwe muri aba bakinyi batatu b'inyuma, ati: "Ni uko nyene bimeze. Turi uko tumeze, ni uko nyene".

Ariko uwo bakinana inyuma wewe Garcia abibona ukundi, aho avuga ati: "Burya ibitsindo birarenganya. Ica mbere cinjiye kubera umupira wanciyeko, ica kabiri umupira wakubise kw'igori uca ugaruka mu kibuga ukorokera kuri Lewandowski.

"Si nibaza ko tuba twaratsinzwe ibitsindo nk'ibi vyose.

"Nimba tutashoboye kugumana mupira hagati, ivyo ari vyo vyose ni uko twariko dukina na Bayern - kumbure umurwi wa mbere i Bulaya. Twari tuzi neza ko rwari urukino rutoroshe na gato".

Bayern ubu ifise umumenyereza mushasha akiri muto Julian Nagelsmann w'imyaka 34 gusa, yasubiriye Hansi Flick, akaba aboneka ko afise ubushobozi bwo gushikana kure Bayern muri rino higanwa.

Ubu Bayern ntirigera itsindwa mu nkino 19 zose zo ku rwego rwa Bulaya ikiniye hanze.