Pep Guardiola avuga ko ikipe ye idashobora kwirara ngo nuko yasezereye Real Madrid muri Champions League
Ahavuye isanamu, Reuters
Umutoza Pep Guardiola avuga ko kuba ikipe ye ya Manchester City yaraye itsinze Real Madrid ari "intambwe imwe" iteye, mu gihe iyi kipe igerageza kwegukana Champions League ku nshuro ya mbere.
City yatsinze Real ibitego 2 - 1 (ibitego byose hamwe 4 - 2 mu mukino ubanza n'uwo kwishyura) ihita ikatisha itike ya kimwe cya kane, ihigitse iyi kipe ifite ibikombe 13 bya Champions League.
Ariko, Guardiola yavuze ko nta gihe gihari cyo kwicara ngo bishimire iyi ntsinzi.
Uyu wegukanye Champions League ebyiri ubwo yatozaga Barcelona, yagize ati: "Turimo kugerageza kwegukana Champions League".
Muri kimwe cya kane, City izahura na Lyon yaraye isezereye Juventus ya Cristiano Ronaldo.
Uwo mukino uzabera i Lisbonne muri Portugal ku itariki ya 15 y'uku kwezi kwa munani.
Biteganyijwe ko indi mikino isigaye yo muri iri rushanwa izakinirwa muri Portugal, iya kimwe cya kabiri ku itariki ya 18 n'iya 19 ndetse n'umukino wa nyuma wo ku itariki ya 23 y'uku kwezi kwa munani.
Guardiola yagize ati: "Niba twibwira ko bihagije [gutsinda Real] tuzagaragaza ukuntu turi ikipe nto. Niba ushaka gutsinda [gutsindira igikombe], ugomba gutsinda amakipe akomeye".
Ahavuye isanamu, Reuters
Guardiola yavuze ko uko gutsinda Real ari igikorwa cy'"ingenzi" ikipe ye igezeho mu rugendo rwo kugerageza kwegukana Champions League.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Mu mwaka w'imikino wa 2015 - 2016, City yageze muri kimwe cya kabiri, isezererwa na Real.
'Ndashaka kuba Ronaldo'
Mu mukino w'ejo, Gabriel Jesus yatsinze igitego cya kabiri ndetse atanga n'umupira wavuyemo icya mbere.
No mu mukino ubanza wabereye muri Espagne, yatsinze igitego muri 2 - 1 batsinze Real.
Ubwo umutoza Guardiola yabazwaga ku musanzu y'uyu mukinnyi mu mikino yombi, yagize ati:
"Abakinnyi bakomeye bagomba kwigaragaza mu marushanwa akomeye no mu mikino ikomeye kandi ibyo yabigaragaje kabiri dukina n'abami b'iri rushanwa".
Uyu rutahizamu w'Umunya-Brazil amaze gutsinda ibitego bitandatu muri Champions League y'uyu mwaka, mu myaka ibiri yindi akaba yaratsinze bine muri buri Champions League.
Jesus yabwiye igitangazamakuru BT Sport ko akora cyane ngo abe nka rutahizamu Ronaldo w'iwabo muri Brazil wafashije ikipe y'igihugu kwegukana ibikombe bibiri by'isi.
Ati: "Ubuhanga bwe butandukanye n'ubwanjye ariko ngomba gukora cyane ngo mbe nka rutahizamu ukomeye".
"Real Madrid ni ikipe ikomeye, bafite abakinnyi benshi. Bashobora[ga] kudutsinda, ni yo mpamvu twaje mu kibuga twiteguye gukora cyane nanone".
"Tugomba gukomeza gukora no gukomeza gukomera no mu mukino uri imbere".
'Tugomba kwemera ko twatsinzwe n'ikipe nziza'
Umutoza Zinedine Zidane wa Real Madrid yagize ati: "Birumvikana ko tudashobora kwishima, twatsinzwe umukino kandi turasezerewe".
"Dutewe ishema n'ibyo twagezeho muri uyu mwaka, uku ni ko umupira w'amaguru umera. Twatsinzwe n'ikipe nziza kandi tugomba kubyemera. Twabonye amahirwe yacu yo gutsinda".
"Ndi umutoza wa Real Madrid kugeza hari igihindutse kidasanzwe".
"Ntabwo mugomba kumbaza ibindi bibazo bijyanye n'ejo hazaza hanjye. Twese tugiye kuruhuka tuzagaruke nanone mu mwaka utaha".
