Cristiano Ronaldo yananiwe gutsinda, Ciro Immobile asatira guca umuhigo

Icyizere cya Cristiano Ronaldo cyo gusoza uyu mwaka w'imikino ari we uhiga abandi bose i Burayi mu gutsinda ibitego byinshi cyakendereye.

Ni nyuma yuko ikipe ye ya Juventus yamaze kwegukana igikombe cya shampiyona, yaraye itsinzwe na Cagliari.

Muri uyu mwaka w'imikino, Cristiano yatsinze ibitego 31 muri shampiyona y'Ubutaliyani izwi nka Serie A, ariko mu ijoro ry'ejo ku wa gatatu byaramugoye.

Luca Gagliano na Giovanni Simeone ni bo binjije ibitego bibiri bya Cagliari yari yakiriye Juventus.

Cristiano ubu ararushwa ibitego bine na rutahizamu Ciro Immobile wa Lazio.

Ni we bahataniye igihembo cy'urukweto rwa zahabu rw'uwatsinze ibitego byinshi kurusha abandi i Burayi muri uyu mwaka w'imikino.

Immobile yaraye atsinze igitego cye cya 35 muri uyu mwaka ubwo ikipe ye ya Lazio yatsindaga Brescia ibitego 2 - 0.

Mu gihe hasigaye umukino umwe ngo shampiyona ya Serie A y'uyu mwaka irangire, Immobile ni we kugeza ubu uhiga abandi i Burayi mu gutsinda ibitego byinshi.

Igitego yaraye atsinze cyatumye aca kuri rutahizamu Robert Lewandowski wa Bayern Munich warangije shampiyona ya Bundesliga y'uyu mwaka atsinze ibitego 34.

Immobile aranabura igitego kimwe ngo anganye n'ufite umuhigo wo gutsinda ibitego bya mbere byinshi muri Serie A mu mwaka umwe.

Ni umuhigo ufitwe na Gonzalo Higuain, watsindiye Napoli ibitego 36 mu mwaka w'imikino wa 2015 - 2016.