Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Napoli yirukanye umutoza Carlo Ancelotti nubwo yakomeje muri Champions League
Ikipe ya Napoli yirukanye uwari umutoza wayo Carlo Ancelotti nta n'amasaha atatu ashize amaze kuyifasha kugera mu cyiciro cya Champions League aho amakipe akina ahita akuranamo.
Iyi kipe yo muri shampiyona ya Serie A yo mu Butaliyani ntabwo yari yagatsinda mu mikino icyenda iheruka gukina mu marushanwa yose, ukuyemo ejo ku wa kabiri itsinda Genk yo mu Bubiligi 4 -0 mu mukino wabereye ku kibuga cya Napoli.
Uyu wari umwaka wa kabiri w'imikino Ancelotti yari atoje Napoli, ariko ubu iri ku mwanya wa karindwi muri shampiyona nyuma y'iyo mikinire mibi yo mu gihe gishize.
Ni yo kipe yonyine gusa yatsinze Liverpool mu minota 90 y'umukino muri uyu mwaka, ubwo yatsindaga Liverpool ibitego 2 - 0.
Mu kwezi gushize kwa cumi na kumwe, umutoza n'abakinnyi ba Napoli bagiranye ubushyamirane bukomeye na perezida wayo Aurelio de Laurentiis.
De Laurentiis yategetse ikipe kujya mu mwiherero ariko Ancelotti n'abakinnyi be bose bahise bajya mu rugo.
Ancelotti yegukanye igikombe cya shampiyona ya Prremier League yo mu Bwongereza n'icya FA Cup inshuro ebyiri ari kumwe na Chelsea mu mwaka w'imikino wa 2009 - 2010.
Hakomeje kuvugwa ko ashobora kuba yafata akazi k'ubutoza muri Arsenal cyangwa Everton kuri ubu zidafite abatoza b'igihe kirekire.
Ni umwe mu batoza batatu gusa bamaze gutwara ibikombe bitatu bya Champions Leagues - we hamwe n'igihangange Bob Paisley wakiniye akanatoza Liverpool na Zinedine Zidane ubu utoza Real Madrid.
Ni nkaho yatunguwe
Bisa nkaho atari azi ko ubuyobozi bw'ikipe buri hafi gutangaza ko yirukanwe, ubwo nyuma y'iyo ntsinzi yagira ati:
"Nzavugana na perezida [w'ikipe] De Laurentiis ejo [uyu munsi] hanyuma dufate icyemezo kibereye Napoli".
"Ku bwanjye, mu gihe hari abakinnyi bari kugaruka kandi hagize ibikosorwa, iyi kipe iracyashobora kurangiza [shampiyona] ku mwanya wa kane".
"Intsinzi yo muri iri joro [ryo ku wa kabiri] iraturuhuye kandi ishobora gutera abakinnyi akanyabugabo mu gihe kiri imbere".
Ariko ubutumwa bwo kuri Twitter nyuma yaho gato ku munsi w'ejo bwagize buti: "SSC Napoli yafashe icyemezo cyo gutandukana n'umutoza w'ikipe nkuru Carlo Ancelotti".
"Ubucuti n'ubwubahane hagati y'ikipe, perezida Aurelio de Laurentiis na Carlo Ancelotti bizakomeza nta gihindutseho na gito".
Amakuru yo mu bitangazamakuru byo mu Butaliyani avuga ko Gennaro Gattuso, wirukanwe na AC Milan mu mpera y'umwaka ushize, ashobora kuba ari we usimbura Ancelotti.
