Abagore ba perezida wa Senegal bavuze ibyishimo batewe no kwakira igikombe cya Afurika

Abagore babiri ba perezida wa Senegal batangaje ibyishimo batewe n'ikipe y'igihugu iherutse kwegukana igikombe cya Afurika ubwo kapiteni w'iyi kipe yari yazanye iki gikombe ngo akimurikire umukuru w'igihugu n'abagize guverinoma.

Marie Khone Faye, umugore mukuru na Absa Faye umugore muto ba Perezida Bassirou Diomaye Faye batangaje - buri umwe ukwe - ibyishimo bagize mu birori byo kwakira iyi kipe ya mbere ubu muri Afurika.

Marie Khone Faye yanditse kuri Instagram ashimira ikipe y'igihugu "abikuye ku mutima", yongeraho ati: "Senegal irabashimira kuri ibi byishimo mudusangije n'umuneza usendereye".

Marie Knone ntabwo yari azwi cyane mbere ya 2024 ubwo umugabo we yabaga perezida wa Senegal. Avuka mu gace kamwe n'umugabo we, bashakanye mu myaka igera kuri 16 ishize, bafitanye abana bane nk'uko bivugwa n'ibinyamakuru byo muri Senegal.

Mu butumwa bwe nyuma yo kwakira igikombe cya Afurika, Marie Knone yavuze ko yifuza ko ibi byishimo batewe n'ikipe y'igihugu bikomeza kuba "ku mitima yacu muri uyu mwaka wa 2026".

Absa Faye, nawe yatanze ubutumwa bw'"ibyishimo byo kwakira Intare za Senegal" nyuma yo gushyikirizwa iki gikombe cya Afurika na kapiteni w'ikipe Sadio Mané.

Avuga ku ikipe y'igihugu Absa yagize ati: "Mwongeye guhuza imitima mwibutsa buri wese ingufu z'ubumwe bwacu".

Absa Faye yashakanye na Perezida Faye mu 2023, ibinyamakuru muri Senegal bivuga ko bafitanye umwana umwe.

Gushaka abagore barenze umwe ni umuco ushingiye ku idini umenyerewe muri Senegal igihugu gituwe n'abaturage benshi bari mu idini ya Islam.

Igikombe cya Afurika ikipe y'igihugu yatwaye – cya kabiri mu mateka ya Senegal - cyahurije hamwe Perezida Bassirou Faye na Minisitiri w'intebe Ousmane Sonko, abagabo bahoze ari inshuti zikomeye muri politike no mu miryango yabo, ariko ubu haboneka guhangana hagati yabo.

Mu 2024 igihe aba bombi biyamamazaga, ishyaka ryabo ryashyize imbere intero ivuga mu rurimi rwa Wolof rumwe mu zivugwa muri Senegal ivuga ngo "Diomaye mooy Sonko", bivuze ngo "Diomaye niwe Sonko" cyangwa ko bombi ari umuntu umwe.

Mu Ugushyingo(11) umwaka ushize ubwo ukutumvikana no guhanganisha imbaraza z'ubutegetsi kwari kugeze kure, Sonko yabwiye abanyamakuru ati: "Ntabwo nkorera Bassirou Diomaye Faye, nkorera Senegal".

Mu muhango wo ku wa gatatu Marie Khone na Absa bavuzeho, Perezida Faye na Minisitiri w'intebe Sonko bawuhuriyemo, kandi Abanyasenegal bagaragaza ko bafite icyizere ko ibi bihe byo kwishimira igikombe cya Afurika bishobora kuba amahirwe yo guhuza aba bombi bagakemura ibibatanya.