CAN 2019: Tanzania na Kenya zahuye n’abakomeye

Mu itsinda C Senegal yatsinze Tanzania bibiri ku busa naho Algeria nayo igenzereza ityo Kenya mu mikino y'igikombe cya Afurika kiri kubera mu Misiri.

Senegal, ikipe itaratwara iki gikombe cya Afurika, umukinnyi wayo Keita Balde yatsinze Tanzania igitego cya mbere ku munota wa 28 naho Krepin Diatta ashyiramo icya kabiri kuwa 64.

Senegal niyo kipe y'igihugu iza imbere y'izindi muri Afurika (22) ku rutonde ngarukakwezi rwa FIFA rw'uku kwezi. Iyi kipe kandi mu 2002 yabashije kugera muri 1/8 cy'imikino y'igikombe cy'isi.

Senegal yatsinze Tanzania idafite kizigenza wayo Sadio Mane muri uyu mukino ubanza, ndetse yabuze amahirwe menshi yo gutsinda mu mashoti 24 bateye ku izamu rya Taifa Stars.

Tanzania ya 131 ku rutonde wa FIFA, yaherukaga muri iki gikombe cya Afurika mu myaka 39 ishize (1980) amahirwe macye yabonye yo gutsinda ntiyayabyaje umusaruro.

Muri iri tsinda, Algeria nayo yatsinze Kenya bibiri ku busa byose byagiyemo mu gice cya mbere bitsinzwe na Baghdad Bounedjah kuri penaliti na Riyad Mahrez wa Manchester City.

Mu gice cya kabiri Algeria - ya 68 ku rutonde rw'uku kwezi rwa FIFA - yihariye cyane umupira mu gihe Harambee Stars byari biyigoye cyane gusatira mu nshuro yabaga ifashe umupira.

Rutahizamu wa Kenya Michael Olunga umukino warangiye atarebye ku izamu rya Algeria.

Algeria, imaze gutwara iki gikombe inshuro imwe, yashoboraga kuba yatsinze ibindi bitego ariko umunyezamu Patrick Matasi ahenshi akabyitwaramo neza kugeza umukino urangiye.

Ku wa kane tariki 27 z'uku kwezi Algeria izakina na Senegal naho Tanzania ihure na Kenya ya 105 kuri ruriya rutonde rwa FIFA.

Mu makipe ane y'ibihugu bigize umuryango wa Afurika y'iburasirazuba Uganda niyo yabashije gutsinda umukino wayo wa mbere muri aya marushanwa itsinze DR Congo.