Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Impamvu Ahmad, Perezida wa CAF, yakozweho iperereza mu Bufaransa
Iperereza rihuriweho ryakozwe na BBC Sport n'ikinyamakuru Josimar cyo muri Norvège ubu rishobora guhishura bimwe mu byatumye umwe mu bayobozi bakomeye b'umupira w'amaguru ku isi ahatwa ibibazo n'abategetsi b'Ubufaransa mu cyumweru gishize.
Ahmad, Perezida w'impuzamashyirahamwe y'umupira w'amaguru muri Afurika (CAF), yahaswe ibibazo i Paris mu murwa mukuru w'Ubufaransa ku cyicaro gikuru cy'ikigo cyo kurwanya ibyaha bishingiye kuri ruswa n'uburiganya mu by'imari, mbere yuko arekurwa nta cyaha ashinjwe.
Icy'ingenzi mu byatumye ahatwa ibibazo, ni kompanyi yo mu Bufaransa itari isanzwe izwi cyane kandi itamenyerewe mu kugurisha ibikoresho by'umupira w'amaguru.
Nyuma yo gutorerwa kuyobora CAF mu mwaka wa 2017, Bwana Ahmad yahise agena iyi kompanyi yitwa Tactical Steel ngo ibe ari yo izajya igurisha kuri CAF ibikoresho bijyanye n'umupira w'amaguru, nubwo ku rubuga rw'iyi kompanyi ntahagaragara ko igurisha ibyo bikoresho.
Ukorana bya hafi na Bwana Ahmad muri CAF, amaze igihe ari inshuti ya nyir'iyo kompanyi.
Habajijwe ibibazo ku ruhare rwa Bwana Ahmad mu itangwa ry'iryo soko, kuba kompanyi Tactical Steel nta burambe ifite mu kugurisha ibikoresho nk'ibyo ndetse no ku giciro byagurishijweho.
Bwana Ahmad, usanzwe ari n'umwe mu ba Visi-Perezida b'ishyirahamwe ry'umupira w'amaguru ku isi, FIFA, yahakanye ibyo aregwa byose avuga ko nta kuri kwabyo.
