Umutoza Patrick Aussems wa Simba avuga ko yizeye guhigika TP Mazembe

Umutoza w'ikipe ya Simba yo muri Tanzaniya igeze bwa mbere mu cyiciro cy'imikino ya kimwe cya kane y'irushanwa ry'amakipe yabaye aya mbere iwayo ku mugabane w'Afurika, avuga ko afite icyizere cyo guhigika TP Mazembe yo muri Repubulika ya Demokarasi ya Kongo.

Ku munsi w'ejo wa gatandatu, hateganyijwe kuba imikino ine y'iri rushanwa - yose ikaba ari imikino ibanza ya kimwe cya kane.

Espérance yo muri Tuniziya ifite igikombe cy'ubushize izaba iri muri Algeria ikina na CS Constantine, Horoya yo muri Guinea-Conakry izakira Wydad Casablanca yo muri Maroc, Al Ahly yo mu Misiri yatwaye iki gikombe inshuro umunani izakinira na Mamelodi Sundowns muri Afurika y'epfo.

Nuko Simba na yo yakire TP Mazembe, mu mukino uzabera i Dar es Salaam.

Aganira na BBC, umutoza Patrick Aussems wa Simba yavuze ko yizera ikipe ye, kugeza ubu imaze gutsinda buri mukino yakiriye muri iri rushanwa uyu mwaka. Avuga ko yujuje ibisabwa byose ngo ihigike andi makipe.

Uyu Mubiligi utoza Simba yagize ati: "Ntekereza ko TP Mazembe yari yo kipe y'intyoza kurusha andi makipe yandi yose yo muri Afurika mu myaka itanu ishize".

"Ni ikipe ifite ubunararibonye bwinshi. Turayubaha cyane, ariko ntituyitinya".

"Iyo ukinira mu rugo ugashobora gutsinda Vita na Ahly, ntekereza ko ushobora no kwitega ko watsinda na Mazembe . Ariko ndabizi uzaba ari umukino ukomeye cyane".