Didier Gomes Da Rosa, watoje Rayon Sports, yagizwe umutoza wa Horoya yo muri Guinea Conakry

Didier Gomes Da Rosa, ufite ubwenegihugu bw'Ubufaransa na Portugali, ku munsi w'ejo ku wa gatatu yerekanwe ku mugaragaro nk'umutoza mushya w'ikipe ya Horoya yo muri Guinea Conakry.

Gomes Da Rosa, watoje Rayon Sports yo mu Rwanda akanayihesha igikombe cya shampiyona mu mwaka w'imikino wa 2012-2013, yashyize umukono kuri kontaro y'imyaka ibiri atoza Horoya.

Gomes Da Rosa w'imyaka 49 y'amavuko, asimbuye Umufaransa Patrice Neveu wari usanzwe atoza iyi kipe, wayivuyemo ku wa kabiri w'iki cyumweru ku bwumvikane bw'impande zombi.

Neveu yavuye muri iyi kipe hashize iminsi itatu gusa ayigejeje mu mikino ya kimwe cya kane cy'irushanwa ry'amakipe yabaye aya mbere iwayo ku mugabane w'Afurika (CAF Champions League).

Ubuyobozi bw'ikipe ya Horoya ntibwasobanuye impamvu Neveu yayivuyemo hashize amezi atanu gusa atangiye akazi.

Biteganyijwe ko Gomes Da Rosa atangira gutoza iyi kipe kuri uyu wa kane, nyuma yaho Soufiane Souare, perezida w'iyi kipe, amugaragarije abakunzi bayo.

Souare yagize ati: "Turashaka guteza imbere abakinnyi bafite impano ba hano mu gihugu, ikaba ari yo mpamvu umutoza yavuze ko azakorana namwe [ikipe], by'umwihariko umutoza wungirije".

"Ntacyo tugikwiye guhisha, niba dushaka gukomeza muri Champions League".

"Ubu ibintu byahindutse, twese tugomba gufatanya mu guteza imbere iyi kipe. Ni ahanyu kumufasha, buri wese mu rwego akoramo, akazi ke [Gomes Da Rosa] kakagenda neza mu kuvugurura Horoya".

Gomes Da Rosa, umutoza mushya wa Horoya, yasabye abagize iyi kipe bose gusenyera ku mugozi umwe mu kugera ku ntego bihaye.

Yagize ati: "Nkunda rwose gukorana n'abo nsanze kuko ni bo bashobora kuduha amakuru ku bakinnyi benshi. Buri gihe ngera ku kibuga isaha imwe mbere yuko imyitozo itangira".

Neveu asimbuye, watoje ikipe y'igihugu ya Guinea guhera mu mwaka wa 2004 kugera mu wa 2006, yatoje Horoya mu gihe cy'amezi atanu gusa nuko ayihesha igikombe cya shampiyona y'iki gihugu.

Gomes Da Rosa si mushya mu mupira w'amaguru w'Afurika.

Yatoje Rayon Sports yo mu Rwanda ayihesha igikombe cya shampiyona yo mu mwaka w'imikino 2012-2013, atoza muri Cameroun aho yahesheje Coton Sport de Garoua igikombe mu mwaka wa 2014 na 2015, ndetse atoza no muri Algeria.

Gomes Da Rosa yanagejeje Coton Sport de Garoua muri kimwe cya kabiri mu mikino y'igikombe cya Confederation Cup.