EPL: Liverpool na Man City batsinze, Man United iranganya

Liverpool yasubiye kw'isonga mw'ihiganwa ryo mu Bwongereza inyuma yo gutsinda Southampton ku kibuga ca Anfield, intsinzi igira iyo indwi yikurikiranya.

Liverpool yatsinze igitego ca mbere ku munota wa cumi ku mupira watewe na Xhedan Shaqiri uca ku mukinyi w'inyuma wa Southampton West Hoedt aca ariyinjiza.

Joel Matip ni we yinjije igitego ca kabiri ku mupira ahawe na Trent Alaxander Anold bica biba ibitego bibiri ku busa.

Mo Salah ni we yatsinze igitego ca gatatu ca Liverpool inyuma y'aho Shaqiri ahaniye ikosa umupira ukubita ku mwamba uca ugaruka mu kibuga.

Mu rundi rukino, igitsindo ca Joao Moutinho wa Wolves catumye uwo mugwi unganya na Manchester United ku kibuga ca Old Trafford mu gihe uwo mugwi uherutse kuja mu cicaro ca mbere ubandanya kuvyifatamwo neza mw'ihiganwa ryo mu Bwongereza.

Uwo mukinyi wo hagati wa Portugal yahawe umupira imbere y'igoli ricungwe na de Gea imbere y'uko yinjiza ico gitego.

Wolves yerekanye umupira mwiza mu gice ca mbere, babuze amahirwe mabi gusa yo kudatsinda urwo rukino inyuma y'aho umunya Brezil Fred yinjirije igitego Man United ahawe umupira mwiza na Paul Pogba.

Manchester City yanyagiye Cardiff City ibitego 5-0 ica iraduga mu kibanza ca kabiri mw'ihiganwa ryo mu Bwongereza.

Mu gice ca mbere gusa caheze Man City itsinze ibitego 3 vyihuta vya Sergio Aguero, Bernaldo Silva na Likay Gundogan.

Mu gice ca kabiri, Riyad Mahrez yaciye yongeramwo ikindi gitsindo ciwe ca mbere muri urwo rukino, n'ica kane muri rusangi, mu nyuma atsinda n'ica gatanu.