Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Mikel Arteta avuga ko Manchester City 'itakinnye neza bihagije'
Umutoza Mikel Arteta yavuze ko gutsindwa na Lyon kwa Manchester City mu mukino wa Champions League wabaye ku wa gatatu nta sano na busa gufitanye n'umubare w'abafana bari ku kibuga Etihad cya Manchester City.
City yatsinzwe ibitego 2-1 na Lyon, imbere y'abafana 40,111 - barutwaho ibihumbi 10 ku mpuzandengo y'abafana basanzwe bitabira imikino yayo muri shampiyona ya Premier League.
Arteta, usanzwe ari umutoza wungirije, ni we watoje uyu mukino kubera ko umutoza Pep Guardiola uri mu gihano cyo kurenga umwanya wagenewe abatoza ku kibuga.
Abajijwe niba umwuka wari uri ku kibuga wagize uruhare mu gutsindwa kwa City, Arteta yagize ati:
"Ibyo sinabigira urwitwazo."
Mu mwaka ushize w'imikino, City yari ifite impuzandengo y'abafana 48,050 bazaga ku kibuga cyayo cya Etihad mu mikino ya Champions League ubwo yageraga mu mikino ya kimwe cya kane.
Yongeyeho ati:
"Mbere na bwo twajyaga tugira abafana nk'aba muri Champions League kandi tugashobora gutsinda umukino."
Arteta yirinze kuvuga niba hari isano iri ku gutsindwa kwa City no kuba umutoza mukuru Guardiola atari ahari nk'umutoza.
"Ukuri ni uko Pep atari ahari kandi tukaba twatsinzwe umukino."
"Iyo Pep aza kuba ahari sinshobora kuvuga niba twari gutsinda ibitego 5-0 cyangwa ngo dutsindwe 3-0."
"Twatangiye umukino gahoro kandi ntitwakinnye mu buryo bumwe buhoraho mu buryo twageragezaga gukina. Twagiye dutakaza umupira kenshi kandi muri iki cyiciro ibi bigukoraho."
