Argentine yatsinze Nigeria mu gikombe c'isi ibitego 2-1

Igitego ca Marcos Rojo mu minota y'inyongera ni co cababaje abanyafrika benshi kinezereka abanye Argentine bishimira kurengana igice ca 16 gishira ica nyuma mu gikombe c'isi ca 2018.

Iyo umukinyi w'inyuma wa Manchester United Rojo atigira imbere hagufi y'igoli rya Nigeria hanyuma ngo atere umupira ahawe na Gabriel Mercado, Argentine yari ivuye mw'ihiganwa rikuru ry'umupira w'amaguru kw'isi.

Lionel Messi yatsinze igitego ciza cane ca mbere, yaciye asimbira ku mugongo wa Rojo kubera umunezero, baca biginana n'abandi bari inyuma y'ikibuga.

Igikombe c'isi 2018: Croatia yatsinze Nigeria 2-0

Argentine mu mayirabiri y'igikombe c'isi yose

Bagize amahigwe inyuma yo gukina nabi mu gice ca kabiri ku buryo Mascherano yakoze n'ikosa ryatumye haba penalite ya Nigeria yatewe na Victor Moses akinira umugwi wa Chelsea mu Bwongereza, baca baranganya.

Umukinyi rurangiranwa wa Argentine Lionel Messi, muri uru rukino yari afise akazi katoroshe kubera ukutumvikana kuri hagati y'abakinyi n'umumenyereza Jorge Sampaoli yavuze, " Ndashimiye abantu bose bari ngaha, mu kwitanga, n'abari mu gihugu ca Argentine bagumanye natwe igihe cose."

Na yo umukinyi rurangiranwa akaba na kizigenza w'umugwi wa Nigeria John Obi Mikel yavuze,"Twakoze ico dushoboye. Mu gice ca kabiri twagwanye cane. Nta kundi. Uwu ni umugwi ukiri muto, mu myaka ine iri imbere, benshi muri bo bazoba bakomeye mw'ihiganwa nk'iri. Ndishimiye aba basore hamwe n'igikorwa twakoze. Nibaza ko twakinye neza cane. Dukwiye kubandanya."

Imirwi ya Afrika yanditse amateka mu gikombe c'isi ca 2018

Messi abaye umukinyi wa gatatu wa Argentine ashoboye gutsinda mu bikombe bitatu vy'isi (2006, 2014 na 2018) inyuma ya Maradona (1982, 1986 na 1994) hamwe na Gabriel Batitstuta (1994, 1998, 2002).

Igice c'igitigiri c'ibitsindo vyiwe 6 vyo mu gikombe c'isi yabitsinze Nigeria.

Nta nkeka ko inyuma y'uru rukino, ibintu bibiri bizobandanya kuvurwako harimwo amagara ya Diego Maradona, uretse inyifato yiwe ku kibuga, bivugwa ko yaciye ajanwa kwa muganga inyuma y'urwo rukino.

Ikindi kintu kizovugwa cane n'uko Nigeria yari ikwiye kuronka penalite aho Rojo yatera umupira n'umutwe hanyuma ukamukorako ku kuboko imbere y'uko umuhagarikizi Cuneyt Cakir yifashishirije video agaca afata ingingo ko ata kosa ririmwo.

Ubu Argentine bazoca bahura n'Ubufaransa bwa mbere mu mugwi C, mu gihe uwatsinze mu mugwi D Croatia bari mu kibanza ca mbere inyuma yo gutsinda Islande 2-1, bazohura na Danmark.