Padiri wo muri Tanzania – unanenga ubutegetsi – yakubiswe bikomeye mu gitero cy''ubugome'

Umupadiri ukomeye wa Kiliziya Gatolika muri Tanzania unanenga ubutegetsi bw'icyo gihugu yakubiswe bikomeye, mu gihe ubushyamirane muri politike burimo kwiyongera mbere y'amatora ateganyijwe kuba mu Kwakira (10) uyu mwaka.

Padiri Charles Kitima, wari witabiriye inama yo mu rwego rw'idini yamaze umunsi wose, yatezwe igico (umutego) n'abantu babiri ari nijoro muri kantine iri hafi y'aho aba mu mujyi wa Dar es Salaam.

Polisi yavuze ko yakubiswe mu mutwe ikintu kidatyaye, nuko nyuma ajyanwa mu bitaro, aho ubu uko amerewe kwahamishijwe hamwe (yaramiwe).

Ababibonye bavuze ko Padiri Kitima yari arimo kuvugana n'abantu benshi mbere y'icyo gitero, aza gusangwa arimo avirirana amaraso ndetse asaba ubufasha, nyuma gato yuko abantu bari bamaze kubonwa bahunga bava aho byabereye.

Polisi ivuga ko yataye muri yombi ucyekwa, mu gihe amaperereza akomeje.

Igitero kuri Padiri Kitima, umunyamabanga mukuru w'inama y'abepiskopi gatolika muri Tanzania (Tanzania Episcopal Conference, TEC), cyamaganwe henshi.

Boniface Mwabukusi, perezida w'ishyirahamwe ry'abanyamategeko bo muri Tanzania ukwayo (itarimo Zanzibar) ryitwa 'Tanganyika Law Society', wasuye uwo mupadiri mu bitaro, yavuze ko cyari "igitero cy'ubugome kigamije kumwambura ubuzima".

Mu butumwa yatangaje ku rubuga nkoranyambaga X, Mwabukusi yavuze ko Padiri Kitima afitiye ubutumwa Abanya-Tanzania bugira buti: "Ntidukwiye kugira ubwoba bwo kuriha ikiguzi cyo guharanira ubutabera no kuzuza inshingano zacu ku gihugu."

Mu busabe bwuko hakorwa "iperereza rinyuze mu mucyo", ku wa gatanu ambasade y'Amerika muri Tanzania yavuze ko icyo gitero "giteye ubwoba kandi ni icy'ubugome", ndetse yamaganye "ibikorwa byose by'urugomo, cyane cyane ibigamije gucecekesha abasaba ubutabera, ubwiyunge, n'uburenganzira bwa muntu".

Ubushyamirane muri politike burimo kwiyongera muri Tanzania mbere y'amatora rusange.

Imiryango iharanira uburenganzira igaragaza guhangayika itewe no kuba ubwisanzure bw'abaturage burimo kurushaho kugabanuka, ndetse no kubazwa inshingano hamwe n'ubutabera na byo bikaba birimo kurushaho kugabanuka.

John Heche, umuyobozi wungirije w'ishyaka CHADEMA ritavuga rumwe n'ubutegetsi, yavuze ko ibyabaye kuri Padiri ari inkuru mbi ku gihugu.

Ikigo cy'ubukangurambaga ku mategeko n'uburenganzira bwa muntu cyo muri Tanzania, cyitwa 'Legal and Human Rights Centre', na cyo cyamaganye icyo "gitero giteye ishozi" cyagaragaje "isura mbi" ku gihugu.

Padiri Kitima akunze kunenga gahunda za leta ndetse arazwi cyane muri Tanzania kubera gushira amanga kwe ku mavugurura kuri demokarasi no ku burenganzira bwa muntu.

Icyo gitero cyo ku wa gatatu, cyahangayikishije abayobozi b'amadini n'abo mu miryango itegamiye kuri leta, cyabaye hashize iminsi Kiliziya Gatolika muri Tanzania isabye leta gukurikiza ubusabe bw'amavugurura mu matora - ibyo bikaba ari iby'ingenzi abatavuga rumwe n'ubutegetsi basaba.

Abayobozi b'amatorero ya gikirisitu, yihariye 60% by'abaturage barenga miliyoni 66 batuye Tanzania, barushijeho gushira amanga ku bibazo by'ubutabera n'imiyoborere.

Ariko uko kunenga kwabo ntikwakiriwe neza na bamwe mu bashyigikiye ishyaka CCM riri ku butegetsi. Bamwe mu bayobozi bo ku rwego rwo hejuru muri CCM basabye abayobozi b'amadini kwirinda kwivanga muri politike.

Mu mpera y'icyumweru gishize, Perezida wa Tanzania Samia Suluhu Hassan yaburiye abatavuga rumwe n'ubutegetsi ko "nta muntu n'umwe uri hejuru y'amategeko".

Yongeyeho ati: "Ntitugomba kwemera ko aya matora aba intandaro y'amakimbirane."

Yanashatse gupfobya ubwoba bwuko amatora ashobora kubamo uburiganya, asezeranya ko leta izakora "ikiri mu bubasha bwayo cyose kugira ngo amatora abe mu bwisanzure no mu mucyo".

Kuva mu mwaka ushize, hakomeje kubaho urukurikirane rw'ibitero no gushimutwa byibasira abanenga leta. Abayobozi bo ku rwego rwo hejuru batavuga rumwe n'ubutegetsi na bo batawe muri yombi, barimo n'umukuru w'ishyaka CHADEMA Tundu Lissu, warezwe ubugambanyi.

Ariko ibitero by'ubu bwoko ku bayobozi b'amadini ntibisanzwe.

Polisi yavuze ko icyari kigambiriwe muri icyo gitero kuri Padiri Kitima kitaramenyekana, amaperereza akaba akomeje kugira ngo abandi bacyekwa bamenyekane.

Leta nta cyo yatangaje kuri icyo gitero.

Ariko Stephen Wasira, umuyobozi wungirije w'ishyaka CCM riri ku butegetsi, yacyamaganye ndetse yoherereje uwo Padiri ubutumwa bwo kwifatanya na we.