Abatinganyi b'Abanya Nigeria basaba ubuhungiro bari mu birukanwe na UK
Ahavuye isanamu, Getty Images
Abategetsi muri Nigeria bavuga ko biteze kwakira Abanya-Nigeria batari munsi ya 38 birukanwe mu Bwongereza.
Aba barimo n'abatinganyi bari basabye ubuhungiro mu Bwongereza.
Abandi ni ababyeyi b'abagore hamwe n'abandi bantu bari bamaze imyaka ibarirwa muri za mirongo baba mu Bwongereza.
Bitezwe kugera mu mujyi wa Lagos kuri uyu wa kane mu rugendo rw'indege rutavugwaho rumwe rwishyuwe na minisiteri y'ubutegetsi bw'igihugu y'Ubwongereza.
Hari ibigaragaza ko hari Abanya-Ghana bamwe, na bo birukanwe, baba bari muri iyi ndege.
Minisiteri y'ububanyi n'amahanga ya Nigeria yabwiye BBC ko abo bantu bireba boherejwe muri iki gihugu kubera ibyaha bijyanye no kwinjira mu gihugu.
Impirimbanyi ziharanira uburenganzira bwa muntu zo mu Bwongereza zivuga ko zihangayikishijwe n'ubuzima bw'abo birukanwe.
Zivuga ko abagore bagera hafi ku 10 muri bo bafite ibibazo bikomeye by'ubuzima bwo mu mutwe, bakaba barimo no gufata imiti yo kubarinda guhuzagurika no guta ubwenge.
Impirimbanyi zemeza ko bamwe mu birukanwe bashobora gutotezwa - bitewe n'imyemerere yabo y'idini cyangwa kubera imiterere yabo ijyanye n'igitsina.
Ku wa gatatu, abigaragambya bateraniye mu karere ka Durham mu majyaruguru ashyira uburasirazuba bw'Ubwongereza, basaba ko abo bantu baguma mu Bwongereza.
