Amerika yemeje integuro yo gutera ibibanza vya Irani muri Syria na Irak

Reta Zunze Ubumwe za Amerika zemeje integuro z’ibitero ku bigo vyegukira Irani muri Syria na Irak, nk’uko abategetsi babibwiye ikinyamakuru CBS News co muri Amerika gikorana na BBC.

Ibi bitero bizokorwa mu kiringo c’imisi itari mike, nk’uko aba bategetsi babivuga, kandi bikazovana n’ingene ikirere kizoba cifashe.

Ibi bibaye inyuma y’igitero c’indege itagira umudereva (drone) cahitanye abasirikare ba Amerika batatu muri Yorodaniya, hari y’urubibe rwa Syria, hari ku wa Mungu.

Amerika yagirije umurwi w’abarwanyi ufashwe mu mugongo na Irani ko ari wo wakoze iki gitero.

Uno murwi, Islamic Resistance wo muri Irak, uzwi ko uhurikiyemwo imihari myinshi y’abarwanyi yahawe ibirwanisho, amafaranga n’inyigisho n’ishami ry’igisirikare ca Irani, Revolutionary Guards. Ni wo wemanze iki gitero co ku wa Mungu.

Hagati aho, Irani irahakana ko ata ruhara ifise muri iki gitero cakomerekeje izindi ngabo za Amerika 41, ku kigo ca gisirikare kizwi nka Tower 22.

Abategetsi ba Amerika bavuga ko igendereza rya Amerika ryemeza ko drone yakoreshejwe muri iki gitero yahinguwe na Irani – kandi ko isa n’amadrone Irani irungikira Uburusiya mu ntambara yabwo muri Ukraine.

Mu kiganiro n’abanyamakuru ejo ku wa kane, umushikiranganji wa Amerika ajejwe kwivuna abansi Lloyd Austin yarashigikiye ingingo yo kutihuta mu kwishura kuri iki gitero, mu kuvuga ati: “Tuzokwishura aho tuzohitamwo, igihe tuzohitamwo n’uburyo tuzohitamwo.

"Nibaza ko buri muntu azi inzitizi zijanye no kumenya abantu bo nyabo turondera”, niko avuga, akongera ko y’uko ata “nzira isanzwe ihari yo gukora ibi”.

Austin abandanya agira ati: "Hari inzira zo gukora ibi ku buryo bitarenga inkombe. Kandi iki ni co twamye dushira imbere igihe cose”.

Abategetsi bavuganye na CBS News ntibavuze igihe nyaco ibi bitero bizobera. Bavuga ko igisirikare ca Amerika gishobora kubikora mu gihe c’ikirere kibi, ariko kigashima ko coba kibona neza aho gishaka gutera kugira ngo ntihagire abasivire bagwa mu mporero.

Perezida Joe Biden amaze igihe aterwa igitsure n’abashingamateka b’Abarepubulika, harimwo n’abanka urunuka Irani, bamusaba gukubita ibibanza bimwe bimwe ku butaka bwa Irani.

Ariko, mu gihe Amerika ibandanya yiyemeza ku ncuro zitari nke kwishura iki gitero ca drone, Biden n’abandi bategetsi bo mu gisata co kwivuna abansi bavuga ko Amerika itariko irondera intambara yeruye na Irani canke icotuma ibintu biyangara mu karere.

"Iki si co ndiko ndarondera”, niko Biden yabwiye abanyamakuru kuri Maison Blanche/White House (ibiro vy’umukuru w’igihugu ca Amerika) mu ntango z’ino ndwi.

Izi nteguro zivugwa ziboneka ko ari izo gutera ibibanza vya Irani muri Syria na Irak, aho gutera hagati muri Irani.

Imirwi itari mike ifashwe mu mugongo na Irani yarongereje ibitero ku bibanza vya Amerika n’ibifitaniye isano na Israel kuva intambara hagati ya Israel na Hamas yadutse ku wa 7 Gitugutu (10) 2023.

Nk’akarorero, umuhari w’aba-Houthis ufashwe mu mugongo na Irani muri Yemen, umaze igihe utera amato mu Kiyaga Gitukura no mu Kigobe ca Aden, ivyatumye Amerika n’incuti zayo bitanguza ibitero kuri uno muhari.

Umutegetsi wo mu bushikiranganji bwo kwivuna abansi bwa Amerika yabwiye CBS ko hari indege ya drone yarashwe mw’ijoro ryakeye mu Kigobe ca Aden, co kimwe na drone yo mu mazi yarashwe igasamburwa mu Kiyaga Gitukura.

Risubiramwo amasoko atavuzwe amazina, itororokanirizo ry’amakuru Reuters ryavuze ejo ku wa kane ko Irani yatahukanye abategetsi bakuru bari muri Syria inyuma y’urukurikirane rw’ibitero vyo mu kirere vya Israel mu ntumbero yo kwirinda ko yokwinjizwa mu ntambara yeruye mu karere.

Abategetsi ba Amerika babwiye imboneshakure CNN yo muri Amerika muri ino ndwi ko hari ibimenyetso vyerekana ko reta ya Irani ifise impungenge zigenda ziyongera ku bikorwa vy’imirwi ikoresha mu karere, aho imaze gukora ibitero birenga 160 ku ngabo za Amerika kuva muri Gitugutu.

Ibiziga vy’abasirikare batatu ba Amerika biciwe muri ico gitero co muri Yorodaniya vyitezwe gushikanwa ku kigo c’ingabo zirwanira mu kirere c’i Delaware kuri uno wa gatanu. Maison Blanche itangaza ko Perezida Biden ariho aza kuba ari.

Aba basirikare batatu bamenyekanye ku mazina ya William Jerome Rivers w’imyaka 46, Kennedy Ladon Sanders w’imyaka 24, na Breonna Alexsondria Moffett w’imyaka 23. Bose bari abo mu kigo c’ingabo z’integabizoza kiri ahitwa Fort Moore mu ntara ya Georgia.