Gushaka itike y'igikombe cy'isi 2026: DRC yatsindiwe iwayo abafana bangiza stade

Ikipe ya Les Léopards ya DR Congo ishobora gufatirwa ibihano nyuma y'uko abafana bayo biraye ku bikorwa remezo bya 'Stade des Martyrs' i Kinshasa bakabyangiza ibindi bakabisahura nyuma y'uko ikipe yabo itsinzwe na Senegal ibitego bitatu kuri bibiri mu mukino wo gushaka tike y'igikombe cy'isi cya 2026.

Mu yindi mikino yabaye ku wa kabiri y'umunsi wa munani mu matsinda yo gushaka umwanya mu gikombe cy'isi, ikipe y'Intambara ku Rugamba y'u Burundi yatsindiwe i Nairobi muri Kenya aho yakiriwe na Gambia, naho iy'u Rwanda itsindira Zimbabwe iwayo.

Mu mukino wa Les Léopards na 'Lions de la Teranga' i Kinshasa ikipe yari mu rugo yatangiye neza aho ku munota wa 26 Cedrick Bakambu yafunguye amazamu, bidatinze ku munota wa 33 Yoane Wissa wa Newcastle United yo mu Bwongereza ashyiramo icya kabiri.

Senegal yijajaye ku munota wa 39 itsinda icya mbere cya Pape Gueye, ku munota wa 53 itsinda icya kabiri cya Nicolas Jackson, ku munota wa 70 Sadio Mané atsinda igitego ariko bemeza ko yaraririye, maze mbere gato y'uko umukino urangira ku munota wa 87 Pape Matar Sarr atsinda igitego cy'intsinzi ya Senegal, biyishyira imbere mu itsinda B n'amanota 18 mu gihe DRC ari iya kabiri na 17.

Bamwe mu bafana basaga 80,000 bari muri stade ntabwo babashije kwakira uku gutsindwa, amashusho yashyizwe ku mbuga nkoranyambaga yagaragaje bashwanyaguza intebe zo muri stade n'ibindi bikorwa remezo.

Hanze ya stade, abafana barakaye bangije banasahura amaduka n'imodoka zari hafi aho, mu gihe inzego z'umutekano zagerageje gukoresha imyuka iryana mu maso mu kubatatanya.

Ibinyamakuru muri DR Congo bivuga ko muri iyi midugararo humvikanye n'amasasu y'imbunda bigacaigikuba.

Amahirwe asigaye ari macye kuba DR Congo yabona umwanya mu gikombe cy'isi kizabera mu mijyi yo muri Canada, Mexico, na Leta Zunze Ubumwe za Amerika. DRC isabwa gutsinda maze igategereza kureba ko Senegal yatsikira mu mikino ibiri isigaye muri aya matsinda izakinwa mu Ukwakira(10) uyu mwaka.

Naho ku byabaye kuri Stade des Martyrs nyuma yo gutsindwa, byitezwe ko impuzamashyirahamwe y'umupira w'amaguru ku isi (FIFA)hamwe n'iyo muri Afurika (CAF)zisesengura ibyabaye, ibishobora gutuma ikipe y'igihugu ya DRC ifatirwa ibihano.

Intamba zasezerewe, Amavubi agarura icyizere

Muri Afurika, mu matsinda icyenda (9) agizwe n'ibihugu bitandatu buri rimwe, ikipe ya mbere mu itsinda izabona 'ticket' y'igikombe cy'isi naho amakipe y'ibihugu ane (4) yabaye aya kabiri yitwaye neza kurusha andi azajya mu cyicirocya kabiri cyo gushaka indi imwe iziyongeraho zikaba ikipe 10 zizahagararira Afurika.

Misiri na Afurika y'Epfo zaraye zongereye amahirwe menshi yo kubona umwanya mu gikombe cy'isi nyuma y'uko Les Pharaohs inganyije na Burkina Faso 0-0, Bafana Bafana ikanganya na Nigeria 1-1.

Cabo Verde (Cap-Vert) na yo yaraye iteye intambwe ikomeye iyiganisha ku kuba yakwandika amateka yo kujya bwa mbere mu gikombe cy'isi, ubwo yatsindaga Cameroun 1 – 0 ikayobora itsinda D.

Mu mikino yaraye ibaye kandi amakipe yamaze gusezererwa ya Kenya na Togo zitwaye neza zibona intsinzi yo kuzihoza amarira, aho Kenya yatsinze Seychelles 5 – 0 naho Togo itsinda Sudan 1– 0.

Mu itsinda C ririmo Amavubi y'u Rwanda, iyi kipe yaraye itsinze Chipolopolo (the Warriors) ya Zimbabwe iri iwayo igitego kimwe mu busa cyatsinzwe na Gilbert Mugisha ku munota wa 40.

Nubwo Chipolopolo yihariye igice cya kabiri igasatira cyane Amavubi umukino ugakinirwa ahanini mu gice cyayo, ntabwo babashije gutsinda izamu rya Fiacre Ntwari w'ikipe ya Kaizer Chiefs. Ibi byatumye Amavubi yongera kugira akanunu k'icyizere cyo kubona umwanya mu gikombe cy'isi mu mikino isigaye.

Bafana Bafana, yaraye ingayije na Super Eagles ya Nigeria 1 – 1, ni yo iyoboye iri tsinda n'amanota 17 mu gihe hasigaye imikino ibiri, ikurikirwa na Benin n'amanota 14 mu gihe Nigeria n'u Rwanda ubu binganya amanota 11.

Mu itsinda F, Intamba mu Rugamba z'u Burundi zakuyeyo amaso muri iri rushanwa nyuma y'uko zitsinzwe na Gambia 2 – 0 mu mukino zakiriwemo na Gambia i Nairobi muri Kenya. Uyu mukino wabaye mu ijoro waranzwe kandi no kubura kw'amashanyarazi hagati mu gice cya mbere umukino ugaharara iminota irenga 10.

Intamba ubu ziri ku mwanya wa kane (4) n'amanota 10 mu gihe Côte d'Ivoire ya mbere ifite amanota 20 na ho Gabon ya kabiri ikagira 19.

Imikino ibiri isigaye yo guhatanira amanota atandatu(6) ntacyoyafasha Intamba cyangwa na Gambia ya gatatu n'amanota 10 na yo, n'iyo zayitsinda yombi.

Mu gihe Kenya na Seychelles za nyuma muri iri tsinda zo zari zamaze gukurayo icyizere na mbere y'uyu munsi w'ejo ku wa kabiri.