Cameroun: Urupfu rwa Anicet Ekane utavuga rumwe n'ubutegetsi waguye muri Kasho rwateje uburakari

Urupfu rw'umunyapolitike ukomeye utavugarumwe n'ubutegetsi muri Cameroun rwateye impaka zikomeye n'uburakari muri iki gihugu kivuye mu matora y'umukuru w'igihugu.

Leta yasabye abaturage kwihangana no kwirinda ibikorwa bishobora guteza umutekano muke.

Minisitiri w'Itangazamakuru akaba n'Umuvugizi wa Guverinoma, René Emmanuel Sadi, yatangaje ko Ekane yari asanganywe uburwayi mbere yo gufatwa ku wa 24 Ukwakira (10). Sadi yavuze ko Ekane yitabwagaho n'abaganga be ndetse n'ab'ivuriro rya gisirikare.

Yongeyeho ko hatangiye iperereza rigamije gusobanura neza uko yapfuye, anihanganisha umuryango we n'abarwanashyaka b'ishyaka Manidem.

Ishyaka Manidem ryo rirashinja leta urupfu rwa Ekane, icyo bise "igitugu" cy'ubutegetsi ryita ko "butemewe n'amategeko".

Umuryango w'Ubumwe bw'u Burayi wavuze ko urupfu rwe "rusize icyuho gikomeye mu biganiro bya politiki muri Cameroun," usaba kurekura abarimo gufungwa mu buryo bunyuranyije n'amategeko kuva amatora yo ku wa 12 Ukwakira yaba.

Umunyamategeko Akere Muna yagaragaje agahinda ko kuba leta yari yaranze kurekura Ekane kandi barakomeje kubisaba bagaragaza ko arwaye cyane.

Avuga ko urupfu rwe ari nko 'kuzimya urumuri rukaze kandi rufite ishyaka, rwamurikaga urugamba rwo kubona ubwigenge bwa demokarasi."

Ishyaka Manidem ryasabye abarwanashyaka kurangwa n'ituze ariko bakaguma biteguye gusaba "igisubizo cy'ubutabera cy'umuryango mugari usizwe na Ekane."

Ekane wari ufite imyaka 74 azwiho kuba yari impirimbanyi ya demokarasi kandi itavugarumwe n'ubutegetsi bwa Perezida Ahidjo n'uwamusimbuye Paul Biya.

Yagize uruhare rukomeye mu matora ya Perezida yabaye mu kwezi k'Ukwakira, aho yabanje gushyigikira Maurice Kamto, kandidatire ye bayanze ashyigikira Issa Tchiroma Bakary, mbere y'uko afatwa agafungwa.

Ekane yatawe muri yombi, hashize iminsi 12 amatora arangiye ariko ibyayavuyemo bitaratangazwa ku mugaragaro.

Ni igikorwa cyabereye i Douala, umujyi w'ubukungu uzwiho kwigomeka, aho yari kumwe n'abandi bayobozi b'ishyaka rye, Manidem.

Mbere gato yo gutangaza uwegukanye intsinzi yo kuyobora igihugu, Cameroun yari ifite umwuka w'ubwoba. Ekane yari mu bavugaga ko Tchiroma Bakary ari we watsinze.

Urupfu rwe rwavuzweho cyane kuko nyuma yo gutabwa muri yombi, yahise ajya gufungirwa mu nyubako ya Minisiteri y'Ingabo.

Abanyamategeko be bavugaga ko nta mpamvu n'imwe yatuma akekwaho ibyaha by'iterabwoba cyangwa ibyaha by'intambara bikurikiranwa n'inkiko za gisirikare.

Nyuma y'ukwezi afunze nta rubanza rwari rwatangira.

Radioyo mpuzamahanga y'Ubufaransa RFI ivuga ko yari afite ibibazo by'ubuhumekero.

N'ubwo yitabwagaho n'ivuriro rya gendarmerie, umuryango we n'abanyamategeko be bari barakomeje gusaba ko yemererwa gukoresha imashini imufasha guhumeka ariko ntiyayihabwa.

Nyuma y'uko urupfu rwe ruteje impaka n'igikuba muri Cameroun, Minisiteri y'Ingabo yatangaje ko hatangiye iperereza hakamenyekana icyamwishe.

Cyrille Rolande Bechon, umukuru w'umuryango utegamiye kuri Leta Nouveaux Droits de l'Homme, yavuze ko urupfu rwa Anicet ari inkuru y'inshamugogo kandi ko ari ikintu cyitumvikana.

Yagize ati: "Anicet Ekane yari ishusho ikomeye mu rugamba rwo guharanira ubwigenge."