Umugabo w'Umwongereza yafashwe arwanira Ukraine
- Umwanditsi, Christy Cooney
- Igikorwa, BBC News
Umugabo w'Umwongereza yafashwe n'ingabo z'Uburusiya arwanira Ukraine, nkuko amakuru abivuga.
Muri videwo igaragara ku mbuga za internet, umugabo wambaye imyenda ya gisirikare avuga ko yitwa James Scott Rhys Anderson, w'imyaka 22, akavuga ko yigeze kuba mu ngabo z'Ubwongereza.
Ibiro ntaramakuru TASS bya leta y'Uburusiya bisubiramo amagambo y'umusirikare wabihaye amakuru avuga ko uwo yise "umucanshuro w'Umwongereza" "yagizwe imfungwa mu karere ka Kursk" ko mu Burusiya.
Kuva mu ntangiriro ya Kanama (8) uyu mwaka, Ukraine yigaruriye igice cy'ako karere ubwo yahagabaga igitero gitunguranye.
Minisiteri y'ububanyi n'amahanga y'Ubwongereza yavuze ko irimo "gufasha umuryango w'umugabo w'Umwongereza nyuma y'amakuru y'ifungwa rye".
Muri iyo videwo, yatangajwe bwa mbere ku rubuga nkoranyambaga rwa Telegram, Anderson abwira umugabo umuhata ibibazo uri inyuma ya 'camera' ko yahoze ari umusirikare wo ku rwego rwa 'private' ('soldat') mu ngabo z'Ubwongereza, kuva mu mwaka wa 2019 kugeza mu mwaka wa 2023.
Avuga ko yinjiye mu mutwe wo mu ngabo za Ukraine ugizwe n'abasirikare b'abanyamahanga b'abakorerabushake nyuma yo gutakaza akazi ke no kubona amakuru kuri televiziyo ajyanye n'iyo ntambara.
Avuga ko yagiye mu mujyi wa Krakow mu majyepfo ya Pologne avuye mu mujyi wa Luton mu majyepfo ashyira uburasirazuba bw'Ubwongereza, nuko ava aho muri Pologne n'imodoka ya bisi imugeza ku mupaka wa Ukraine.
Ukraine yagabye igitero gitunguranye mu karere ka Kursk ku itariki ya 6 Kanama, yigira imbere ho kilometero 29 muri ako karere, ndetse yigarurira ubuso bwa kilometero kare zigera ku 1,000 z'ubutaka bw'Uburusiya.
Uburusiya bwagabye abasirikare bagera ku 50,000 muri ako karere, ndetse bwatangiye kwisubiza ubutaka, mu gihe habera imirwano ikaze.
