Nyuma yo gusezerera Cameroun, DRC yakuyemo na Nigeria isigaza intambwe imwe ikagera mu gikombe cy'isi

Ikipe y'igihugu ya Repubulika ya Demokarasi ya Congo yasezereye Nigeria mu mukino wa 'barrage' wo gushaka umwanya mu gikombe cy'isi nyuma yo kunganya igitego kimwe kuri kimwe maze kuri za penaliti Nigeria igatsinda eshatu DRC igatsinda enye.

Nyuma yo gutsinda uyu mukino waberaga i Rabat muri Maroc, 'Les Leopards' bahise binjira mu kiciro cya nyuma cy'imikino ya 'barrages' y'amakipe y'ibihugu atandatu yo ku migabane itandukanye azishakamo amakipe abiri ajya mu gikombe cy'isi cya 2026 kizabera mu mijyi yo muri Amerika, Canada na Mexique.

Kugeza ubu amakipe ya Bolivia, DRC na Nouvelle-Calédonie ni yo amaze kubona umwanya muri iyo mikino ya 'barrages' izatangira muri Werurwe(3) umwaka utaha.

Gusezerera ikipe ya 'Super Eagles' byagoye 'Les Leopards' kuko ku munota wa gatatu gusa iyi kipe y'umutoza Sébastien Desabre yari imaze kwinjizwa igitego cyinjijwe na Frank Olenyeka, ariko mbere gato y'uko igice cya mbere kirangira Elia Mechak yagaruriye ikizere Abanyacongo barebaga uyu mukino yinjiza igitego cyo kwishyura umukino uza kurangira nta kipe yongeye kureba mu izamu ry'indi.

DRC igeze kuri ibi nyuma y'uko mu cyumweru gishize yasezereye igihangange muri Afurika cya Cameroun. Iyi kipe ya DRC yari yabaye iya kabiri mu itsinda B.

Ibiro bya Perezida Félix Tshisekedi wa DRC byatangaje ko "yishimiye iyi ntambwe ikomeye" ikipe y'igihugu yateye igana ku kwinjira mu gikombe cy'isi.

Yasabye ko kuri uyu wa mbere saa tanu ku isaha ya Kinshasa abantu bajya ari benshi ku kibuga cy'indege mpuzamahanga cya N'djili kwakira abakinnyi ba 'Les Leopards' bahita berekeza kuri 'Stade des Martyrs' mu birori byo kwishimira iyo ntsinzi. Ibiro bye byavuze ko na we ubwe aza kuba yibereye kuri stade kwakira aba bakinnyi bise 'intwari'.

Uko DRC yageze aha mu cyumweru gishize

Nyuma y'imyaka irenga 25 Ingwe za RD Congo zidatsinda Intare Zitaneshwa za Cameroun, ku wa kane nijoro zabigezeho mu minota y'inyongera ndetse zinabuza iyi kipe ya André Onana na Bryan Mbeumo kujya mu gikombe cy'isi.

Chancel Mbemba ni we wabaye intwari y'umukino wa 'barrage' mu gushaka ikipe iserukira Africa mu gice cya nyuma cy'indi mikino ya 'barrage' hagati y'imigabane mu gushaka amakipe ajya mu myanya micye isigaye yo gukina igikombe cy'isi cya 2026 muri Amerika, Canada na Mexico.

Mbemba, Kapiteni wa Leopards, bayobewe aho aturutse ubwo yatsindaga igitego n'umutwe kuri 'corner' yari itewe ku munota wa 91 w'umukino, maze atera agahinda Cameroun – ikipe ifite umuhigo muri Afurika wo kwitabira igikombe cy'isi inshuro nyinshi, umunani.

Muri uyu mukino waberaga i Rabat muri Maroc aho Bryan Mbeumo na Karl Etta Eyong ba 'Les Lions Indomptables' babonye amahirwe arenze amwe yo gutera mu izamu rya Congo ariko ba myugariro bayo bayobowe na Chancel Mbemba bagahagarara neza cyane.

Mu wundi mukino nk'uyu wa 'barrage' muri Africa wa kimwe cya kabiri, na wo wabereye i Rabat mbere y'uyu, Nigeria yatsinze Gabon 4 – 1.

Intambwe ebyiri RDC igasubira aho iheruka mu 1974

Les Leopards za Congo zagiye bwa mbere mu gikombe cy'isi mu 1974 ubwo igihugu cyitwaga Zaïre, ni nabwo giherukayo.

Umugabane wa Afurika mu gikombe cy'isi cy'umwaka utaha izahagararirwa n'amakipe icyenda ari yo;

Amakipe ya Afurika n'inshuro amaze kwitabira igikombe cy'isi;