Ukraine yasambuye vya muzinga S-300/400 i Belgorod mu Burusiya, yoba yakoresheje HIMARS – ISW

Ikigo c'ubushakashatsi ku ntambara co muri Amerika, Institute for the Study of War (ISW), mu cegeranyo c’ejo ku wa 3 Ruheshi (6), cagarutse ku makuru atangazwa n’imbuga ngurukanabumenyi za gisirikare zo ku mpande zompi zivuga ko ku wa Mungu igisirikare ca Ukraine cashoboye gusambura ibikoho vya muzinga vyo mu bwoko bwa S-300/400.

ISW ivuga ko ibi bikoho birasa ibisasu vya misire bikorora indege vyasamburiwe mu buraruko bwa Belgorod, ku butaka bw’Uburusiya, bigashobora kuba vyarashwe hakoreshejwe igisasu ca misire kiraswa n’inkoho ya muzinga yo mu bwoko bwa HIMARS ya Amerika.

Haraciye imisi Reta zunze Ubumwe za Amerika n’izindi ncuti za Ukraine ziyitezuriye mu nzitizi zashizeho ku bijanye n’ingene yokoresha ibirwanisho ziyiha mu ntambara yayo n’Uburusiya, ibi bikayishoboza gutera ibibanza kanaka hagati ku butaka bw’Uburusiya.

Uburusiya bugabisha ibihugu vy’Uburengero ko iyi ngingo ishobora gutuma ibintu vyunyuka, ariko Uburengero bwobwo nta bwoba bufise.

ISW yandika iti: “Kuva Reta Zunze Ubumwe za Amerika zikuyeho igice c’inzitizi zibuza Ukraine gukoresha ibirwanisho vya Amerika ku bibanza vya gisirikare mu turere two ku butaka bw’Uburusiya twegereye umupaka hafi y’intara ya Kharkiv, igisirikare c’Uburusiya kibandanya kivuga ko ingabo za Ukraine ziriko zirarasa mu ntara ya Belgorod zikoresheje HIMARS”.

Isoko rya mbere ryatangaje iyi nkuru ni umuhora wo ku rubuga rwa Telegram wegamiye Ukraine, “Spy Dossier,” wasohoye amavidewo n’amasanamu y’ibi bikoho biriko birasha, mu gihe uwundi muhora wa Ukraine wo kuri Telegram nyene werekanye ko ano masanamu yavuye mu kigwati ca Kiselevo hafi ya Belgorod.

Imbuga ngurukanabumenyi z’igisirikare c'Uburusiya nazo zifatira kuri ano masanamu mu kwemeza iki gitero, aho zivuga ko vya muzinga bibiri vyo mu bwoko bwa S-400 hamwe na tingatinga, ari vyo vyasambuwe. Ano makuru yiriwe aravugwako cane ku musi wose w’ejo ku wa mbere.

Ikigwati ca Kiselevo kiri ku birometero 12 mu buraruko bushira uburengero bwa Belgorod, ku birometero 80 uvuye i Kharkiv muri Ukraine.

Ifatiye ku makuru atangwa n’abihweza ibintu n’ibindi mu bijanye n’igisirikare ku mpande zompi, ISW ivuga ko iki gitero cakozwe hakoreshejwe igisasu ca misire co mu bwoko bwa GMLRS kiraswa na HIMARS, kuko ari co gishobora gushikira ikigwati ca Kiselevo, mu gihe ibindi Ukraine ifise bidashobora gushikayo.

Abanditse aya makuru babona ko “amasoko yo mu Burusiya azobandanya yemeza ko igisasu ico ari co cose kizoba gishitse mu ntara ya Belgorod kizoba kirashwe na HIMARS, nubwo kizoba ari ikirashwe n’iyindi nkoho”.

Igisirikare c’Uburusiya kibandanya gicucagira ibisasu ku gisagara ca Kharkiv gikoresheje ibikoho vya muzinga vyo mu bwoko bwa S-300.

Hagati aho, Ukraine iracarindiriye ko ibirwanisho vyose yemerewe n’incuti zayo z’Uburengero bishika ku rubuga rw’intambara. Bimwe muri ibi birindiriwe cane ni indege z’intambara zo mu bwoko bwa F-16, bikavugwa ko mu mezi ari imbere ibi bihugu bigiye kuzirekura.

Ukraine iranyotewe cane izi ndege kuko zishobora gusambura ibisasu vya misire, gutyo zigashobora kuyifasha gukingira ibisagara vyayo bigeramiwe n’ibitero vy’Uburusiya.

F-16 kandi zishobora kurwanya indege z’intambara z’Uburusiya, ari nazo zabuhaye ubushobozi bwo gutera intambwe zikomeye ku rubuga rw’intambara. F-16 zo ubwazo kandi zishobora gukora ibitero, iki kigashobora guha ingabo za Ukraine akaryo ko gukora ibitero.

Mu kiganiro aherutse kugirana n’itororokanirizo ry’amakuru AFP, Perezida Volodymyr Zelensky wa Ukraine avuga ko ari ngombwa ko igisirikare ciwe kirwanira mu kirere kironswa indege ziri hagati ya 120 na 130 kugira ngo gishobore kwaka Uburusiya ubushobozi bwo kwiganzira ikirere muri ino ntambara.