Ucunga umutekano wa Bobi Wine yarezwe nyuma yo gukorerwa iyicarubozo – Umunyamategeko

Ucungira umutekano umwe mu bakuru b'abatavuga rumwe n'ubutegetsi muri Uganda, Bobi Wine, yarezwe ubujura bukomeye, nyuma y'iminsi umugaba mukuru w'ingabo z'icyo gihugu avuze ko yamufunze.

Mu cyumweru gishize, Jenerali Muhoozi Kainerugaba, umuhungu wa Perezida Yoweri Museveni, yemeje ko yafunze Eddie Mutwe nyuma y'iminsi itanu aburiwe irengero.

Umunyamategeko wunganira uwo ucunga umutekano, ubundi izina rye nyakuri ni Edward Sebuufu, yavuze ko umukiliya we yakorewe iyicarubozo.

Uwo munyamategeko yabwiye ikinyamakuru the Daily Monitor cyo muri icyo gihugu ko yakubitishijwe "insinga z'amashanyarazi".

Umunyamategeko Magellan Kazibwe yongeyeho ko Sebuufu afite "ububabare bukomeye" ndetse ko yanakanzwe cyane (gukanda) "imyanya y'ibanga" ye.

Kazibwe yabwiye abanyamakuru ko Sebuufu yafatishijwe amashanyarazi ku mubiri (ibizwi nka 'électrocution') kandi ko itsinda ry'uyu munyamategeko riteganya kumujyana ku bitaro.

Imiryango iharanira uburenganzira imaze igihe ishinja abategetsi kwibasira abatavuga rumwe n'ubutegetsi muri Uganda, cyane cyane iyo amatora yegereje.

Ubwo Sebuufu yajyanwaga mu rukiko ku wa mbere, abashinzwe umutekano bagerageje kumukingiriza kugira ngo itangazamakuru ritamubona.

Ariko videwo zagaragaje uwo ucunga umutekano wa Bobi Wine yambaye ibirenge, ndetse atambuka bimugoye.

Mu cyumweru gishize, Jenerali Kainerugaba yatangaje ku mbuga nkoranyambaga ko yafunze Eddie Mutwe. Uwo mugaba mukuru w'ingabo za Uganda yavuze ko uwo ucunga umutekano wa Bobi Wine yogoshwe ndetse ko ateganya kumukona.

Uku gufungwa kwe kubaye mu gihe Uganda yitegura amatora yo mu mwaka wa 2026. Museveni, umaze imyaka 39 ku butegetsi, yitezwe guhatana na Bobi Wine.

Impirimbanyi nyinshi z'uburenganzira bwa muntu zamaganye ifungwa rya Sebuufu. Hagati aho, akanama (komisiyo) k'uburenganzira bwa muntu ka Uganda kasabye ko arekurwa aka kanya.

Imiryango itegamiye kuri leta na yo yaburiye ko ifungwa rye riri mu gikorwa kiri kuri gahunda kigamije gucecekesha abafite ibitekerezo bitandukanye n'ibya leta ndetse no gusyonyora abatavuga rumwe n'ubutegetsi, mbere y'amatora rusange.

Ariko leta yegeka ubushyamirane hagati y'abasivile na polisi ku batavuga rumwe n'ubutegetsi. Leta ivuga ko abatavuga rumwe n'ubutegetsi bakora za mitingi nta ruhushya bafite.

Umunyamategeko Kazibwe yongeyeho ko uretse ubujura bukomeye, Sebuufu yanarezwe ubujura bworoheje bujyanye n'ibivugwa ko byabereye mu karere ka Lwengo.