Iran yanyonze uwahoze ari minisitiri ufite ubwenegihugu bwa UK warezwe ubutasi

Alireza Akbari umunya-Iran ufite ubwenegihugu bw’Ubwongereza wari warakatiwe urwo gupfa yishwe amanitswe, nk’uko itangazamakuru rya leta ya Iran ribivuga.

Kuwa gatatu, umuryango wa Akbari wasabwe kujya aho afungiye “kumusura bwa nyuma” kandi umugore we yavuze ko yari asigaye afungiye mu kato.

Akbari wahoze ari minisitiri w’umutekano wungirije wa Iran yafunzwe mu 2019 aza guhamwa n’ibyaha byo gukorera ubutasi Ubwongereza, ibyaha we yahakanye.

Ubwongereza bwari bwasabye Iran guhakarika uko kumwica no kumurekura.

Kuwa gatanu, minisitiri w’ububanyi n’amahanga w’Ubwongereza James Cleverly yaburiye ko “Iran idakwiye gukomeza ubugome bwabo bwo kwica”. 

Kuwa gatatu kandi Cleverly yari yanditse kuri Twitter ati: “Iki ni igikorwa gifite impamvu za politike cya leta y’urugomo isuzugura byeruye ubuzima bwa muntu”.

Igazeti y’ubucamanza bwa Iran yitwa Mizan yatangaje ko Alireza Akbari yishwe amanitswe, ariko ntiyatangaza itariki nyayo ibyo byabereye.

Muri iki cyumweru ibitangazamakuru muri Iran byatangaje video igaragaza Akbari yemera ibyaha akanasaba imbabazi. 

Kuwa gatatu BBC ishami ry’igi-Perse yatangaje ubutumwa bw’amajwi ya Akbari avuga ko yakorewe iyicarubozo agahatirwa kwemera ibyaha atakoze imbere ya camera.

Mu ntangiriro z’iki cyumweru, umuvugizi wa minisiteri y’ububanyi n’amahanga y’Ubwongereza yabwiye BBC ko barimo gufasha umuryango wa Akbari kandi bakomeje kuvugana n’abategetsi ba Iran kuri we.

Uwo yavuze ko basabye ko abahagarariye Ubwongereza babonana na Akbari, ariko leta ya Iran ntabwo yemera ubwenegihugu bubiri ku baturage bayo. 

Mu butumwa bw’amajwi bwa Akbari avuga ko yabaga mu mahanga mu myaka ishize ubwo yatumirwaga gusura Iran abisabwe n’umudiplomate wo ku rwego rwo hejuru wa Iran wari mu biganiro ku ntwaro kirimbuzi n’abategetsi bandi bo ku isi.

Ahageze, nk’uko abivuga, yashinjwe kumena amabanga yo hejuru mu butasi y’inama nkuru y’umutekano ya Iran, “akabihemberwa icupa ry’umubavu uhumura n’ishati”.

Akbari avugako “yabajijwe akanakorerwa iyicarubozo” n’abakora mu butasi “amasaha arenga 3,500”.

Yashinje kandi Iran “kwihorera ku Bwongereza mu kunyica”.

Hashize amasaha ubwo butumwa bw’amajwi butangajwe, ku nshuro ya mbere igazeti Mizan yemeje ko Akbari yahamwe n’ibyaha byo gutata kandi ko Urukiko rw’Ikirenga rwanze ubujurire bwe.

Imibanire y’Ubwongereza na Iran yarazambye mu mezi ya vuba kuva Ubwongereza bushyizeho ibihano ku bapolisi bakuru ba Iran n’abashinzwe igipolisi cy’umuco, mu gusubiza ku bikorwa by’urugomo byibasira abigaragambya.

Mu myaka ya vuba Iran yataye muri yombi abaturage bayo babarirwa muri za mirongo bafite ubundi bwenegihugu cyangwa abanyamahanga bahatuye, kenshi bashinjwa ubutasi cyangwa kubangamira umutekano.

Umwaka ushize Nazanin Zaghari-Ratcliffe na Anoosheh Ashoori bafite ubwenegihugu bw’Ubwongereza bararekuwe bemererwa no kuva muri Iran nyuma y’uko Ubwongereza burangije umwenda w’igihe kirekire bwari bufitiye Iran.

Gusa abandi bongereza nibura babiri bo muri Iran baracyafunze, barimo na Morad Tahbaz ufite ubwenegihugu bwa Amerika.