Abapolisi batandatu ba Kenya biciwe mu mutego hafi y'umupaka na Somalia

Abapolisi batandatu ba Kenya biciwe mu majyaruguru ashyira uburasirazuba bw'icyo gihugu, nyuma yuko bagabweho igitero hafi y'ikigo cyabo kiri hafi y'umupaka na Somalia, nkuko umutegetsi wo muri ako karere yabivuze.

Nta mutwe wigambye icyo gitero, ariko umukuru wa polisi muri ako karere ka Garissa, Mohamed Mwabudzo, yabwiye BBC ko uburyo cyakozwemo buri mu mujyo umwe n'uw'ibitero byagabwe n'umutwe w'intagondwa zigendera ku mahame akaze yiyitirira idini rya Isilamu za al-Shabab zo muri Somalia.

Yavuze ko abo bapolisi batezwe umutego ejo ku cyumweru ahagana saa kumi n'imwe n'iminota 30 za mu gitondo (5:30) ku isaha yo muri Kenya - ni ukuvuga ahagana saa kumi n'iminota 30 (4:30) ku isaha yo mu Rwanda no mu Burundi - ubwo bari barimo kwitegura amasengesho yabo ya mu gitondo.

Uretse abo bapolisi batandatu bapfuye, abandi bapolisi bane bajyanwe ku bitaro bakomeretse.

Al-Shabab ikunze kugaba ibitero byambukiranya umupaka muri ako gace, byibasira abasirikare ba Kenya n'abaturage b'abasivile.

Mwabudzo yavuze ko uburyo icyo gitero cyagabwemo bw'"agatero shuma [guerrilla]" buhuye n'"uburyo bw'ibitero byambukiranya umupaka bigamije guhungabanya umutekano muri aka karere" bigabwa na al-Shabab.

Yongeyeho ati: "Uyu mutwe ucyekwa wakoresheje intwaro z'ubwoko butandukanye kugira ngo ushobore kwirara mu nkambi."

Iyo nkambi yagabweho igitero yabagamo inkeragutabara - ni ukuvuga abakorerabushake bafasha abapolisi mu gucunga umutekano mu turere twa kure.

Al-Shabab - ikorana n'umutwe wa al-Qaeda - igenzura ibice binini byo mu majyepfo no rwagati muri Somalia.

Umutwe wa al-Shabab umaze imyaka hafi 20 mu ntambara igamije guhirika leta ya Somalia.