Al-Shabab yateye kuri hoteli yo mu murwa mukuru wa Somalia

Abashinzwe umutekano hamwe n'ababibonye bavuze ko intagondwa zo mu mutwe ugendera ku mahame akaze yiyitirira Islam za al-Shabab zagabye igitero kuri hoteli iri hafi y'ibiro bya perezida mu murwa mukuru Mogadishu wa Somalia.

Mbere, uwo mutwe wari warateye kuri iyo hoteli Syl, ikunze kwakira abategetsi bo muri leta ya Somalia.

Ababibonye batangaje ko ibiturika hamwe n'urusaku rw'amasasu byumvikanye biva muri iyo hoteli, babwira ibiro ntaramakuru Reuters ko abarwanyi bari bakiri imbere muri iyo hoteli.

Ibitangazamakuru bikorana n'uwo mutwe bivuga ko abadepite bane ba Somalia bakomeretse. Nta cyo leta ya Somalia yari yabivugaho ku mugaragaro.

Mbere yaho, al-Shabab yavuze ko abarwanyi bayo bagenzura iyo hoteli kandi ko barimo kurasa "abakozi n'abasirikare bakuru... ba leta".

Farah Ali, utuye hafi y'ibiro bya perezida, yabwiye Reuters ati: "Twabanje kumva ikintu giturika cyane, nuko hakurikiraho urusaku rw'amasasu. Twumva ko abarwanyi barimo imbere [muri hoteli] kuko turimo kumva ukurasana."

Umuyobozi wo mu rwego rushinzwe umutekano yabwiye ibiro ntaramakuru AFP ati: "Abagabo bitwaje imbunda benshi binjiye ku ngufu muri iyo nyubako nyuma yo gusenya urukuta rw'umutekano bakoresheje igiturika cyane."

Hassan Nur, warokotse icyo gitero abicyesheje kurira urukuta, yagize ati: "Sinzi abapfuye n'abakomeretse ariko hari hari abantu benshi imbere [muri hoteli] ubwo igitero cyatangiraga."

Abandi babibonye batangaje ko babonye abapolisi bahagera nyuma y'iminota gusa igitero gitangiye, batangira kurasana n'intagondwa.

Urubuga Calamada rw'amakuru, rufitanye imikoranire na al-Shabab, rwavuze ko abadepite nibura bane n'umuvugizi wa leta ya Somalia bakomerekeye muri icyo gitero.

Mu byumweru bya vuba aha bishize, ibitero byari byaragabanutse mu gihe umutekano wakajijwe, nyuma yuko leta ya Somalia ikajije umurego w'igitero cyayo cya gisirikare kuri uwo mutwe.

Al-Shabab igenzura ibice binini by'amajyepfo no rwagati muri Somalia.

Uyu mutwe ukorana na al-Qaeda ndetse umaze imyaka hafi 20 urwanya leta ya Somalia ishyigikiwe n'Umuryango w'Abibumbye.

Ibiro ntaramakuru bya Somalia, Sonna, byatangaje ko ku wa kane, Perezida wa Somalia Hassan Sheikh Mohamud yakoranye inama n'abategetsi ba gisirikare kugira ngo bategure uko bakwisubiza ubutaka batakaje.

Ibihugu byinshi nk'Ubwongereza n'Amerika bifata umutwe wa al-Shabab nk'uw'iterabwoba. Amerika yagabye ibitero bya gisirikare kuri uwo mutwe.

Abarwanyi bawo bazwiho kugaba ibitero kuri za hoteli, zirimo n'iyi hoteli Syl banateye mu mwaka wa 2019.

Mu 2022, abarwanyi b'uyu mutwe biraye muri hoteli Villa Rays iri mu murwa mukuru, bica abantu nibura 14.

Imyaka itatu mbere yuko batera kuri hoteli Villa Rays, abarwanyi ba al-Shabab bagabye igitero kuri hoteli Asasey yo mu mujyi wa Kismayo uri ku cyambu (ikivuko mu Kirundi) mu majyepfo ya Somalia, bica abantu nibura 26, barimo n'umunyamakuru uzwi cyane hamwe n'abanyamahanga.