Guverineri Purusi avuga ko imva rusange zirimo imirambo irenga 170 zatahuwe nyuma yuko M23 ivuye Uvira

Imva rusange ebyiri zirimo imirambo nibura 172 zatahuwe mu mujyi wa Uvira mu ntara ya Kivu y'Epfo mu burasirazuba bwa Repubulika ya Demokarasi ya Congo (DRC), nyuma yuko inyeshyamba za AFC/M23 ziwuvuyemo, nkuko umutegetsi wo hejuru muri leta yabibwiye ibiro ntaramakuru Reuters.

Izo nyeshyamba zafashe uwo mujyi by'igihe gito mu kwezi kw'Ukuboza (12) kw'umwaka ushize. Ni umujyi unyuzwamo ibicuruzwa byinshi ukora ku kiyaga cya Tanganyika, hafi y'umupaka n'u Burundi. Zatangiye kuwuvamo hashize icyumweru ku gitutu cy'Amerika, ndetse ingabo za DRC (FARDC) zawusubiyemo mu kwezi gushize.

Umuvugizi wa AFC/M23 Lawrence Kanyuka yabwiye ibiro ntaramakuru Reuters ducyesha iyi nkuru ko nta makuru y'imva rusange yigeze amenya mu gihe uwo mutwe wamaze muri Uvira, anashinja leta ya DRC gukwirakwiza icengezamatwara rigamije kwangiza isura y'uwo mutwe.

BBC News Gahuzamiryango ntiyashoboye kugenzura mu buryo bwigenga uko abo bantu bapfuye.

Jean-Jacques Purusi, Guverineri w'intara ya Kivu y'Epfo washyizweho n'ubutegetsi bw'i Kinshasa, yabwiye abanyamakuru mu mujyi wa Uvira ko izo mva zabonetse mu gace ka Kilomoni no mu gace ka Kavimvira.

Yongeyeho ko imva imwe yari irimo imirambo 31 naho indi irimo imirambo 141, nkuko bikubiye mu magambo yavuze ku wa kabiri yafashwe agatangazwa mu gihugu ku wa kane.

Mashauri Mwindule, impirimbanyi y'uburenganzira bwa muntu yo muri ako karere, yabwiye ibiro ntaramakuru Reuters ko izindi mva zatahuwe mu cyaro cya Kabimba, kiri mu ntera ya kilometero umunani uvuye mu mujyi wa Uvira.

Umuryango uharanira uburenganzira bwa muntu, Human Rights Watch (HRW), mu Kuboza kw'umwaka ushize watangaje ko abarwanyi ba M23 bakoze ubwicanyi buhutiyeho muri Uvira, imirambo iboneka mu duce twinshi, turimo na Kavimvira.

Umuryango HRW washingiye ku makuru wahawe n'abaturage hamwe n'umukozi w'Umuryango w'Abibumbye (ONU). Icyo gihe AFC/M23 ntiyasubije kuri ibyo birego ariko mbere yari yarashinje uwo muryango gukora "igikorwa cy'amakuru y'ibinyoma agamije kuyobya" cyo kwibasira AFC/M23.

HRW yavuze ko ingabo za DRC n'imitwe yitwaje intwaro ifatanya na zo, na zo zakoze ubwicanyi n'ubundi bugizi bwa nabi mbere yuko inyeshyamba zifata uwo mujyi no mu gihe izo ngabo zari zirimo ziwuvamo.

AFC/M23 igenzura ibice byinshi byo mu ntara ya Kivu y'Epfo no mu ntara ya Kivu ya Ruguru, birimo n'imijyi ikomeye ya Goma na Bukavu yafashe mu mwaka ushize.

Inzobere za ONU, DRC n'ibihugu byinshi byo mu burengerazuba bw'isi bashinja u Rwanda gufasha umutwe wa M23 mu kuwuha abasirikare, ibikoresho n'amategeko.

U Rwanda ruhakana gufasha M23 ariko rukemera ko rufitanye ubufatanye na yo mu by'umutekano kandi ko rwashyizeho "ingamba z'ubwirinzi".

Kuva mu byumweru bishize, imirwano yarakomeje hagati y'impande zombi mu bice byinshi byo mu burasirazuba bwa DRC nubwo hari ibikorwa by'abahuza banyuranye, barimo Angola, Qatar n'Amerika, biherutse no gutuma izo mpande zemeranya ku gahenge.

Intambara mu burasirazuba bwa DRC yongeye kwaduka kuva mu mpera y'umwaka wa 2021 nubwo imaze imyaka hafi 30 ihagarara ikongera ikubura.

Ku wa kabiri, mu ijambo yagejeje ku gihugu, Perezida w'Amerika Donald Trump yongeye kuvuga ko "mu mezi 10 ya mbere" y'ubutegetsi bwe mu mwaka ushize, yarangije "intambara umunani" ku isi zirimo n'intambara hagati ya "[DR] Congo n'u Rwanda", binyuze mu masezerano Perezida wa DRC Félix Tshisekedi na Perezida w'u Rwanda Paul Kagame bagiranye i Washington DC mu Kuboza kw'uwo mwaka.