Colombia: Abacukuzi ba zahabu batabawe nyuma yo kumara amasaha hafi 18 baheze mu kirombe

Leta ya Colombia yavuze ko abakozi 18 bari baheze mu kirombe gicukurwamo zahabu cyo mu majyaruguru ashyira uburengerazuba bw'icyo gihugu bakamaramo amasaha hafi 18, batabawe n'abakora ibikorwa by'ubutabazi bwihuse.

Ibiro ntaramakuru AFP byatangaje ko abo bacukuzi bari baheze muri icyo kirombe cy'i El Minón, mu karere ka Antioquia, ku wa kane, nyuma yuko ibikoresho binaniwe gukora.

Nyuma y'igikorwa cy'ubutabazi cyamaze amasaha 12, abo bakozi bose bameze neza, nkuko ikigo cya Colombia cy'ubucukuzi bw'amabuye y'agaciro (ANM) cyabivuze.

Mu ibaruwa yandikiye leta, umuyobozi w'umujyi ('Mayor') wa Remedios yavuze ko uko bigaragara icyo kirombe nta ruhushya cyari gifite rwo gucukurwamo.

Minisitiri w'ubucukuzi bw'amabuye y'agaciro n'ingufu z'amashanyarazi wa Colombia yavuze ko igikorwa cyo gutabara abo bacukuzi cyarangiye nyuma gato ya saa cyenda z'ijoro (03:00) ku wa gatanu.

Videwo y'icyo gikorwa cy'ubutabazi igaragaza bagenzi b'abo bacukuzi bakoma amashyi ndetse bavugira hejuru mu byishimo, ubwo abo bacukuzi bazamukaga bava muri icyo kirombe.

Yarley Erasmo Marin, uhagarariye ishyirahamwe ry'abacukuzi ryo muri ako gace, yabwiye AFP ko kunanirwa gukora kw'imashini kwatumye inyubako irinda inkangu ihirima, ifunga inzira y'ibanze iva muri icyo kirombe.

Byabaye ngombwa ko abo bacukuzi bari baheze mu kirombe bahabwa umwuka wo guhumeka wa 'oxygen' unyujijwe mu mpombo mu gihe bari bategereje gutabarwa, nkuko radio yo muri ako gace yitwa ABC yabitangaje.

Ikigo ANM cyasohoye itangazo kivuga ko abacukuzi b'amabuye y'agaciro bakwiye "kwirinda ibikorwa by'ubucukuzi binyuranyije n'amategeko, bishyira mu kaga ubuzima n'umutekano w'ababikora ndetse bikagira n'ingaruka ku mutungo kamere w'igihugu no ku bidukikije".

Impanuka zo mu bucukuzi si ikintu kidasanzwe muri Colombia ndetse abantu babarirwa muri za mirongo bazipfiriyemo mu myaka ya vuba aha ishize.