'Drone' y'Uburusiya yasekuye igorofa y'amacumbi i Kiev iraturika yica abantu mu bitero bikaze kuri Ukraine

Abantu batandatu bapfuye abandi barenga 10 barakomereka ubwo indege nto yo mu bwoko bwa ya 'drones' yinjiraga mu nyubako y'igorofa igaturika, mu bitero bya bene izi ndege nyinshi z'Uburusiya byibasiye Ukraine uyu munsi.

Mu kwamagana ibyo bitero Perezida Volodymyr Zelensky yavuze ko 'drones' zigera kuri 430 n'ibisasu 18 bya misile byarashwe, avuga ko inyubako ndende nyinshi zangiritse.

Hagati aho, Ukraine na yo yakajije ibitero ku bikorwa remezo bya peteroli mu Burusiya, aho ibitero bya drones byibasiye icyambu kinini cyohereza ibitoro by'Uburusiya kiri ku nyanja y'umukara.

Umuriro wagurumanye ku itunganyirizo ry'ibitoro rya Sheskharis mu Burusiya, ubwato burashya hamwe n'inzu y'igorofa.

Umukuru w'intara ya Krasnodar mu Burusiya yatangaje ko abantu batatu bakomeretse mu gitero cyashegeshe ibikorwa remezo by'ibitoro kandi muri ako gace batangaje ibihe bidasanzwe.

Naho i Kiev umwe mu baturage babonye ibitero bya 'drones' z'Uburusiya yavuze uburyo yabonye imwe yinjira mu igorofa maze igaturika umuriro ugakwira hose.

Ati: "Nabibonye n'amaso yanjye."

Utundi turere dutandukanye twa Ukraine na two twagabweho ibitero n'Uburusiya. nko mu mujyi wa Chornomorsk aho ibitero bya 'drones' byishe abantu babiri.

Perezida Zelensky yavuze ko Ukraine yarashe ku Burusiya misile ndende zo mu bwoko bwa "Long Neptune" mu gitero cyayo, ariko ntiyatangaje aho izo misile zageze.

Muri Kyiv, inyubako zituwe n'abaturage zatewe "mu duce dutandukanye tw'umujyi hafi ya twose", nk'uko umuyobozi w'ingabo mu mujyi, Tymur Tkachenko, yabivugiye kuri Telegram.

Uyu yatanze ubutumwa asaba abaturage guhungira mu bwihisho umunota umwe nyuma ya saa sita z'ijoro kuri uyu wa kane.

Serivisi zo kuzimya inkongi zo mu gace ka Lisovyi muri Kyiv yavuze ko 'drone' yaguye ku igorofa ya karindwi mu nyubako y'amacumbi maze igaturika, ibi byatumye amagorofa kuva ku ya munani kugeza ku ya kane asenyuka, nk'uko umuvugizi yabibwiye BBC.

Abantu barenga 40 batabawe, abandi 14 bo bakuwe mu nzu batuyemo zirimo gushyaga, mu gihe undi muntu umwe yakuwe mu bisigazwa by'inyubako yasenyutse.

Abashinzwe gutanga amakuru bavuze ko ibikorwa by'umuriro n'ingufu byo muri Kyiv byangiritse cyane, bituma inyubako zimwe mu murwa mukuru zibura ubushyuhe.

"Igitero cyari kinini cyane, kirimo drones, na misile nini ziraswa kure," nk'uko umudepite wo muri Ukraine, Lisa Yasko, yabibwiye BBC.

Yongeyeho ati: "Byari bimeze nko kumva uburiri bwawe bushyiguka hamwe n'idirishya."

Abategetsi bavuze ko amatsinda y'abaganga yajyanywe ahabereye inkongi hose, mu gihe umukuru wa Kiev, Vitali Klitschko, yavuze ko abantu icyenda barimo kwitabwaho mu bitaro, umwe muri bo akaba ameze nabi cyane.

Ingabo z'ikirere za Ukraine zatangaje ko 'drones' n'ibisasu biyobowe byari bigamije ibindi bice bitandukanye by'igihugu birimo na Sumy.