Ahari inkambi z'impunzi muri Goma habaye 'imbuga nsa'

Inkambi z'impunzi zari ziri ku nkengero z'umujyi wa Goma zahoze zirimo abantu ibihumbi amagana ubu ni imbuga gusa nyuma y'ifatwa ry'uyu mujyi wigaruriwe n'abarwanyi ba M23.

Umwe mu banyamakuru wigenga ukorera i Goma wasuye inkambi za Kanyaruchinya na Lushagara yabwiye BBC ko yasanze amahema hafi yose muri izi nkambi ari hasi.

Yagize ati: "Urebye hose ni imbuga zuzuyemo amabuye y'amakoro n'amashashi gusa. Ntiwatekereza ko aha hari abantu ibihumbi n'ibihumbi".

Ntibizwi neza niba impunzi zari zisigaye muri izi nkambi zaratashye ku bushake cyangwa ku gahato.

Dany Kalume, umwe mu bagize sosiyete sivile ya Goma yabwiye BBC ko benshi mu bari batuye muri izi nkambi basubiye mu ngo zabo mu duce twa Rutshuru na Masisi tugenzurwa na M23, ko mu cyumweru gishize M23 yatanze imodoka zo gucyura abari basigaye muri zimwe muri izo nkambi.

Inkambi za Bulengo, Kimashini na Lushagara zari ziri mu burengerazuba bwa Goma, abari bazirimo bazivuyemo ubwo imirwano yacaga ibintu mu gace ka Mubambiro, ubwo M23 yarimo isatira umujyi wa Goma.

Ibyo byatumye impunzi zari muri izi nkambi zongeye guhunga zerekeza hagati mu mujyi wa Goma. Nyuma benshi ntibongeye gusubira muri izi nkambi, nk'uko umunyamakuru wazisuye abivuga.

Kuva mu kwezi kwa Kanama (8) umwaka ushize impunzi zari zarahunze imirwano ziturutse mu bice bya teritwari za Rutshuru, Masisi na Lubero bigenzurwa na M23 zatangiye gutahuka.

Mu mpera za Kanama 2024, ikigo kigenga La Veille Humanitaire de Bwito cyavuze ko abagera ku 100,000 basubiye mu ngo zabo muri 'groupement' ya Bwito muri Rutshuru.

M23 yagiye isaba impunzi gutahuka ivuga ko ibice igenzura birimo amahoro, kandi igashinja leta gufata izi mpunzi nk'ingwate izibuza gutaha.

Leta yagiye ishinja M23 kwica abasivile inaburira impunzi kwitondera gusubira mu bice bigenzurwa na M23.

Imiryango ifasha ivuga ko mbere y'uko imirwano ikomera inkambi za Kanyaruchinya na Lushagara zonyine zarimo impunzi z'imbere mu gihugu zibarirwa hagati ya 300,000 na 400,000.

Izi mpunzi zari zibayeho mu buzima buteye ubwoba.

Umwaka ushize ubwo icyorezo cy'ubushita bw'inkende (Mpox) cyacaga ibintu muri DR Congo, izi nkambi zari izingiro ry'icyo cyorezo.

Kuri kimwe mu bigo byari byashinzwe gukurikirana abarwaye Mpox i Goma, 70% by'abajyaga kwivuzayo bari abavaga mu nkambi z'impunzi, nk'uko abari babishinzwe babibwiye BBC. 75% muri abo babaga ari abana.