Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Uwateguraga Miss Rwanda yasabiwe gufungwa imyaka 16
Ubushinjacyaha mu Rwanda bwasabiye Kagame Ishimwe Dieudonné wateguraga irushanwa rya Miss Rwanda gufungwa imyaka 16 ku byaha aregwa, nk’uko amakuru abivuga.
Urubanza rwe mu mizi rwatangiye kuwa gatatu mu rukiko i Kigali ariko umucamanza ahita ategeka ko rushyirwa mu muhezo.
Uregwa we yabanje gusaba ko urubanza rwe rubera mu ruhame kugira ngo abantu bamenye ibirukubiyemo.
Ishimwe uzwi nka Prince Kid aregwa ibyaha bibiri bishingiye ku birego by'umwe mu bitabiriye Miss Rwanda:
- Gusaba undi ishimishamubiri rishingiye ku gitsina
- Guhoza undi ku nkeke bifitanye isano n'imibonano mpuzabitsina
Mu maburanisha yabanje, Ishimwe yahakanye ibyaha yarezwe avuga ko ari umwere.
Mu kwezi kwa Gicurasi(5) yakuweho kimwe mu byaha yari yarezwe cyo gusambanya undi ku ngufu.
Ibinyamakuru mu Rwanda bivugwa ko mu iburanisha ryabaye kuwa gatatu mu muhezo ubushinjacyaha bwasabiye Ishimwe Dieudonné gufungwa imyaka 16.
Ishimwe yatawe muri yombi muri Mata (4) uyu mwaka nyuma y’ibirego byatanzwe n'umwe mu bakobwa bitabiriye Miss Rwanda mu myaka ishize.
Uru ni rumwe manza zigarukwaho cyane kandi zitavugwaho rumwe mu Rwanda muri iki gihe.
Ibinyamakuru mu Rwanda bivuga ko umucamanza kuwa gatatu yategetse ko uru rubanza ruzasomwa tariki 28 z’uku kwezi k’Ukwakira.
Nyuma y'ibi birego kuri Ishimwe, leta yahagaritse by'agateganyo irushanwa rya Miss Rwanda, kimwe mu bikorwa by'imyidagaduro bikurikiranwa na benshi mu Rwanda.
