Salah Hamouri: Israel yirukanye umunyamategeko w'Umunye-Palestine imwohereza mu Bufaransa

 Matt Murphy

BBC News

Minisiteri y'ubutegetsi bw'igihugu ya Israel yirukanye umunyamategeko mu burenganzira bwa muntu ufite ubwenegihugu bwa Palestine n'Ubufaransa, nyuma yo kumushinja ko ateje inkeke ku mutekano.

Minisiteri y'ubutegetsi bw'igihugu yavuze ko Salah Hamouri, w'imyaka 37, yashorewe na polisi yerekezwa mu ndege ijya mu Bufaransa mu gitondo cyo kuri iki cyumweru.

Uyu wari umaze ubuzima bwe aba i Yeruzalemu, yambuwe uburenganzira bwo kuhaba nyuma yuko abategetsi bamushinje kuba umwe mu bagize umutwe w'iterabwoba.

Hamouri ahakana ibyo birego ndetse imiryango iharanira uburenganzira bwa muntu yamaganye iyirukanwa rye.

Minisiteri y'ububanyi n'amahanga y'Ubufaransa na yo yavuze ko ibabajwe n'icyo cyemezo, ivuga ko yamaganye "icyemezo cy'abategetsi ba Israel, kinyuranyije n'amategeko, cyo kwirukana Salah Hamouri akoherezwa mu Bufaransa".

Ariko mu itangazo, minisiteri y'ubutegetsi bw'igihugu yavuze ko Hamouri "yateguye, atanga urugero ndetse acura umugambi wo gukora ibitero by'iterabwoba" ku "baturage [ba Israel] n'Abanya-Israel bazwi cyane".

Minisitiri w'ubutegetsi bw'igihugu Ayelet Shaked, wo muri leta ya Israel irimo gucyura igihe, yashimye icyemezo cyo kumwirukana nk'intsinzi ye.

Mu itangazo yasohoye, yagize ati: "Igihano ku muterabwoba Salah Hamouri cyasojwe ndetse yirukanwe muri Israel.

"Iki cyari igikorwa cyamaze igihe kirekire kandi ni igikorwa gikomeye cyane ngezeho kuba narashoboye gutuma habaho iyirukanwa rye mbere yuko nsoza inshingano zanjye, nifashishije ububasha mfite bwo guteza imbere urugamba rwo kurwanya iterabwoba".

Hamouri afite ubwenegihugu bw'Ubufaransa akomora kuri nyina. Yari afite uburenganzira bwo kuba i Yeruzalemu, bushobora gukurwaho n'abategetsi.

Akora mu muryango Addameer w'Abanye-Palestine utanga ubufasha bwo mu rwego rw'amategeko no ku burenganzira bw'imfungwa.

Mu kwezi kwa cumi mu 2021, minisiteri y'ingabo ya Israel yatangaje ko uwo muryango ari uw'iterabwoba, hamwe n'indi miryango itanu y'Abanye-Palestine itari iya leta.

Igisirikare cya Israel cyavuze ko iyo miryango ifitanye isano n'umutwe 'Popular Front for the Liberation of Palestine' (PFLP), umutwe w'intagondwa w'Abanye-Palestine Israel ifata nk'umutwe w'iterabwoba.

Umuryango uharanira uburenganzira bwa muntu Amnesty International wamaganye kwirukanwa kwe, uvuga ko "arimo kuriha ikiguzi kinini kubera akazi ke nk'umunyamategeko w'Abanye-Palestine".

Amnesty International yongeyeho iti: "Kwirukanwa mu turere twigaruriwe twa Palestine ni uguhonyora bikomeye amategeko mpuzamahanga n'amasezerano ya kane ya Geneva [Genève].

"Bishobora no kuba icyaha cyibasira inyokomuntu".

N'umuryango HaMoked w'Abanye-Palestine uharanira uburenganzira bwa muntu, wavuze ko uko kwirukanwa kwe kwatanze "urugero ruteje ibyago" kandi ko ari "uguhonyora bikomeye uburenganzira bw'ibanze".