U Rwanda rwafunze insengero 'zirenga 5000' ku bw''umutekano n'ituze ry'abahasengera'

Insengero zirenga 5,000 zimaze gufungwa mu Rwanda kuva mu kwezi gushize, abategetsi bavuga ko zitubahirije amabwiriza y'ubuzima n'umutekano, arimo no kuba zidafite uburyo bwo kubuza amajwi kugera hanze y'urusengero (buzwi nka soundproof).

Ahanini ibi byakozwe ku nsengero za gikristu hamwe n'imisigiti micyeya. Abategetsi bavuga ko zimwe muri izo nsengero zakoreraga mu buvumo cyangwa ku nkengero z'imigezi.

Umukozi wo muri minisiteri y'ubutegetsi bw'igihugu yabwiye BBC Gahuzamiryango ko iki gikorwa cyo gufunga izi nsengero zitujuje ibisabwa kirimo gukorwa ku bufatanye bw'inzego zitandukanye, zirimo urwego rw'igihugu rushinzwe imiyoborere (RGB), inzego z'ibanze na polisi.

Mu kiganiro n'igitangazamakuru cya leta (RBA), Minisitiri w'ubutegetsi bw'igihugu w'u Rwanda Jean Claude Musabyimana yagize ati: "Ntabwo biri gukorwa kugira ngo bagire uwo babuza gusenga, ahubwo ni ukugira ngo umutekano wabo ndetse n'ituze ry'abahasengera rikorwe neza."

Minisitiri Musabyimana yavuze ko mu bisabwa insengero harimo nko kuba inzu yubatse yuzuye, kuba ifite uburyo butuma amajwi ayivamo adasakuriza abantu batari mu rusengero, kugira umurindankuba, kugira ubwiherero no kuba irekura umwuka ukinjira.

Kugeza ubu, insengero zirenga 5600 ni zo zimaze gufungwa, nkuko bitangazwa n'urubuga rw'amakuru Igihe rubogamiye kuri leta.

BBC Gahuzamiryango yagerageje kuvugana n'urwego rw'igihugu rw'imiyoborere, ruyoboye iki gikorwa cyo gufunga insengero zitujuje ibisabwa, kugeza ubu ntibirashoboka.

Ni bwo bwa mbere habayeho igikorwa kinini cyane cyo gufunga insengero kuva itegeko rijyanye no kugenzura ikwirakwira ryazo ryashyirwaho mu myaka itanu ishize.

Ritegeka insengero gukorera mu nyubako zitekanye, ndetse rikabuza ikoreshwa ry'indangururamajwi zivuga cyane mu gihe cy'amateraniro.

Rinategeka ababwirizabutumwa kuba bafite impamyabushobozi mu by'iyobokamana (theology), mbere yuko bafungura urusengero.

Ubwo iryo tegeko ryatangiraga gukurikizwa mu mwaka wa 2018, insengero zigera kuri 700 zarafunzwe.

Icyo gihe, Perezida w'u Rwanda Paul Kagame yavuze ko igihugu kidacyeneye inzu nyinshi zo gusengeramo, ashimangira ko umubare munini wazo uberanye gusa n'ibihugu biteye imbere mu bukungu bifite amikoro yo gutuma zikomeza gukora.

Kagame, uherutse gutsindira manda ya kane nka Perezida n'amajwi 99%, ategeka sosiyete nyarwanda igenzurwa mu buryo bukomeye, aho abamunenga bavuga ko hari ubwisanzure bucye bwo kuvuga icyo umuntu atekereza.

Abategetsi bavuga ko barimo guhagurukira izo nsengero kuko zagize igihe cy'imyaka itanu cyo kugira ngo zuzuze ibisabwa.

Umukuru wa RGB Usta Kayitesi yasubiwemo n'ikinyamakuru the New Times kibogamiye kuri leta agira ati: "Leta yafashe ingamba ku ikwirakwira ry'inzu zo gusengeramo. Turacyabona [inzu] izangiritse ndetse zidafite isuku."

Minisitiri Musabyimana yavuze ko zimwe mu nsengero zafunzwe zirimo n'"aho ugera ugasanga abantu barahasengera régulièrement [mu buryo buhoraho] ariko nta rusengero ruhari".

Yatanze ingero z'abasengera ku misozi, mu buvumo, mu bitare n'ahandi avuga ko rimwe na rimwe hateza impanuka, harenze 108 mu gihugu "ndetse hakunda gushyira n'ubuzima bw'abantu mu kaga".

Umubare munini w'Abanyarwanda ni abakristu ariko hari na benshi bakurikiza imigenzo gakondo.

Insengero za gikristu, akenshi ziyoborwa n'ababwirizabutumwa bifitemo impano baba bavuga ko bakora ibitangaza, zariyongereye cyane mu bice byinshi byo muri Afurika mu myaka ya vuba aha ishize.

Zimwe ni insengero nini cyane, buri cyumweru ziyobokwa n'abasenga babarirwa mu bihumbi, ariko izindi ni inzu ntoya cyane zubakwa nta ruhushya rwerekana ko ari byo zizakorerwamo.