Icuraburindi i Minembwe: Imirwano ikomeye n'ibitero bya 'drones' mu gihe agahenge katubahirijwe

Kumenya neza neza ibirimo kubera mu gace ka Minembwe n'inkengero zako muri rusange biragoye kuva mu ntangiriro z'iki cyumweru kuko hari ugucika kw'itumanaho rya telephone ritangwa n'iminara igenzurwa n'ingabo za leta FARDC ubundi igafatwa n'abarwanyi ba Twirwaneho mu gihe imirwano ikomeje kumera nabi.

Mu ntangiriro z'iki cyumweru umukuru wa sosiyete sivile mu karere ka Minembwe yabwiye BBC ko imirwano yo mu cyumweru cyashize hafi y'agace ka Point-Zero mu misozi ya Fizi yashegeshe ingendo zituma ibintu by'ibanze nka mazutu, imiti, n'ibikoresho nkenerwa bigera i Minembwe.

Mu ntangiriro z'uku kwezi umuvugizi w'ingabo za leta muri Kivu y'Amajyepfo yatangaje "intego yo kwisubiza Minembwe Centre" imaze igihe kigera ku mwaka igenzurwa n'abarwanyi ba Twirwaneho bafatanya na M23.

Mu gihe ku wa gatatu saa sita wari umunsi wo gutangira kubahiriza agahenge hagati y'uruhande rwa leta n'abafatanya narwo n'urwa M23 n'abafatanya narwo, ariko ntabwo ibi byubahirijwe. Amakuru BBC Gahuzamiryango yahawe na bamwe mu bafite ababo mu gace ka Minembwe aremeza ko imirwano yakomeje.

Biragoye kwemeza abarenze ku gahengebagatera abandi.

Ubu byifashe bite i Minembwe mu by'ukuri?

Minembwe-centre ni akarere kameze nk'akari mu kibaya. Kari hagati y'imisozi ya Fizi mu burasirazuba muri iyo misozi. Ni ho hari agace k'ingenzi kazwi nka Point-Zero k'amasanganzira yerekeza Baraka mu majyepfo, Uvira mu majyaruguru ashyira uburasirazuba.

Munsi y'iyi misozi hari umugezi wa Rwiko hakurya yawo niho hahera imidugudu ya Minembwe ituwe n'abaturage benshi gukomeza iburengerazuba werekeza Minembwe-Centre.

Mu burengerazuba bwa Minembwe hariyo umugezi wa Minembwe hejuru hakaba imisozi irimo Gahwera ifatwa nk'irembo ry'iburengerazuba bwa Minembwe.

Sebagabo Mufashi ukuriye sosiyete sivile ya Minembwe ntangiriro z'iki cyumweru yabwiye BBC ko ibitero by'indege nto zitajyamo abadereva [drones] z'ingabo za leta bituruka mu burasirazuba n'iburengerazuba.

Ingabo za leta zivuga ko zihanganye n'umutwe wa Twirwaneho ufatanya na M23.

Mu itangazo ryo kuwa kane nijoro, umuvuzi wa M23 yamaganye "ibitero by'ubwicanyi" ku baturage b'Abanyamulenge mu gace ka Minembwe bikorwa n'ingabo za leta zifatanyije n'ingabo zirimo iz'u Burundi.

Mbere, uruhande rw'ingabo za leta rwahakanye kurasa ku baturage ko ahubwo muri iyi mirwano rurasa ku birindiro by'inyeshyamba za Twirwaneho.

Mu itangazo ryo kuri uyu wa gatanu, Igisirikare cya DR Congo cyasohoye itangazo kivuga ko inyeshyambaza M23, kivuga ko zifatanya n'ingabo z'u Rwanda, zateye ibirindiro bya FARDC muri Kivu y'Epfo na Kivu ya Ruguru mu guhonyora agahenge kasabwe na Angola

Muri Minembwe-centre, amakuru agera kuri BBC Gahuzamiryango yemeza ko abaturage batakibasha kubona mazutu ikoresha za moteri z'amashanyarazi, kandi iminara y'itumanaho yo ku misozi ikikije Minembwe nayo ubu idakora kubera kubura mazutu ndetse n'ubushake bw'abayigenzura.

Bamwe mu bahaye amakuru BBC bavuga ko mu mirwano yo ku wa gatatu no ku wa kane ingabo zirwanira ku butaka za FARDC, Wazalendo n'ingabo z'u Burundi zavanye abarwanyi ba Twirwaneho na M23 kuri Point-Zero zikabambutsa umugezi wa Rwiko bigatuma n'abaturage benshi bari batuye hakurya y'uwo mugezi bahunga bakerekeza i Minembwe-centre.

Abandi babwiye BBC Gahuzamiryango ko abarwanyi ba Twirwaneho/M23 – bivugwa ko bafashwa n'ingabo z'u Rwanda, bakiri ku misozi ya Fizi hejuru ya Minembwe no kuri Point-Zero bakomeza kugerageza kurasa ibitero by'indege za drones.

BBC ntiyabashije kugenzura mu buryo bwigenga ibivugwa n'impande zombi kuri ayo makuru.

Gucika kw'itumanaho muri ako gace biri mu bituma bigoye kurushaho kumenya neza no kwemeza ibirimo kuba muri aka karere karimo imirwano.

Mu gihe havugwa ibitero by'indege za 'drones' i Minembwe-centre no mu nkengegero zaho, nta makuru yemeza bidasubirwaho ibimaze kwangirika niba hari n'abamaze kwicwa n'ibyo bitero, cyangwa imirwano yo kubutaka hagati ya Twitwaneho na FARDC n'abafatanya na bo.