Niger: Umuryango wa Perezida wahiritswe uvuga ko utazi uko ameze

Benewabo wa Perezida wahiritswe wa Niger Mohamed Bazoum bavuga ko nta makuru ye bafite kuva gahunda ye yo gutoroka yaburizwamo.

Bazoum, hamwe n'umugore we n'umuhungu wabo, yagumishijwe mu nzu ya perezida kuva igisirikare cyamuhirika ku butegetsi ku itariki ya 26 Nyakanga (7) uyu mwaka.

Ku itariki ya 19 Ukwakira (10), yagerageje guhunga ari kumwe n'umuryango we, abatetsi (guteka) be n'abamurinda, akoresheje indege ya kajugujugu - ariko bose barakumiriwe.

Abo mu muryango we bavuga ko igihe cya nyuma baherukira amakuru ye ari ku munsi wabanjirije uko kugerageza gutoroka.

Muri Niger no mu mahanga hari abakomeje gusaba ko Bazoum arekurwa.

Niger iri mu karere mu myaka ya vuba aha ishize kabayemo amahirikwa menshi y'ubutegetsi yakozwe n'igisirikare, nko mu bihugu bituranye na yo bya Mali na Burkina Faso.

Imitwe yitwaje intwaro igendera ku mahame akaze ya kisilamu igenzura ibice bimwe bya Mali, Niger na Burkina Faso.

Agatsiko ka gisirikare kari ku butegetsi muri Niger kavuze ko kafashe ubutegetsi muri Nyakanga kubera ukuntu umutekano wari ukomeje kuzahara.

Kuva iryo hirikwa ry'ubutegetsi ryaba, benewabo wa Bazoum bakomeje kwamagana "ihohoterwa" bavuga ko ubutegetsi bushya bwa gisirikare bubakorera.

Ould Salem Moustapha Saïd, umunyamategeko wunganira uwo muryango, yavuze ko hari "ukwibanda ku muryango wa Perezida Bazoum" guteye impungenge gukorwa n'abategetsi ba gisirikare.

Saïd yatanze ikirego mu rukiko kubera ukuntu bafashwemo.

Umuryango w'ubukungu w'ibihugu byo muri Afurika y'uburengerazuba (CEDEAO/ECOWAS) washishikarije abahiritse ubutegetsi gusubizaho Perezida Bazoum.

CEDEAO yakangishije gukora igikorwa cya gisirikare muri Niger niba umuhate wo mu rwego rwa diplomasi nta cyo ugezeho. Yanafatiye Niger ibihano bikomeye byo mu rwego rw'ubukungu.

Ubutegetsi bwa gisirikare muri Niger bwavuze ko bishobora kubufata imyaka igera kuri itatu kugira ngo hasubizweho ubutegetsi bwa gisivile.

CEDEAO yanze icyo gitekerezo cy'imyaka itatu, none ubu ibiganiro birakomeje.